Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 75 Hüküm no: 21 Orijinal metin no: [4b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Duka v. Mihal’in bağını Dimitri v. Pavlo’ya satması Vilâyet-i Rumeli’nde Yenişehir kazâsı müzâfâtından Fener nâhiyesine tâbi‘ Ağrafa nâm karyeden Duka v. Mihal nâm zimmî meclis-i şer‘-i hatîr-i lâzımü’t-tevkīrde yine nâhiye-i merkūmeye tâbi‘ Yalukati? nâm karyeden işbu râfi‘ü hâze’l-kitâb Dimitri v. Pavlo nâm zimmî muvâcehesinde bi’t-tav‘ ve’r-rızâ ikrâr ve takrîr-i kelâm edip karye-i merkūme Ağrafa kurbunda Poça demekle ma‘rûf karyede vâki‘ bir tarafdan İstati v. Yakovi bağına ve bir tarafdan İskarine v. Hristo bağına ve bir tarafdan hendeğe ve bir tarafdan İstirayna v. Mavros bağına müntehî tahmînen üç dönüm bir kıt‘a mülk bağımı cümle-i tevâbi‘ ve levâhıkı ve kâffe-i menâfi‘ ve merâfıkı ile mesfûr Dimitri’ye dokuz yüz nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ ve kabz-ı semen edip mebî‘-i mezkûru mahallinde kabza müşterî-i merkūmu taslît eyledim ba‘de’l-yevm [5a] bağ-ı mahdûd-ı mezkûr Dimitri’nin mülk-i müşterâ-yı sarîhidir keyfe mâ yeşâ mutasarrıf olsun dedikde mukırr-ı mezbûru vech-i meşrûh üzre cârî olan ikrâr ve takrîrin el-mukarru lehü’l-mezbûr Dimitri bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Hurrire fî selhi Muharremi’l-harâm li sene tis‘a ve ışrîn ve elf. Şuhûdü’l-hâl: Ali b. Abdullah, Mustafa b. Mehmed, Mehmed b. Hanefi, Perviz b. Abdullah, Yakub b. Kurd, Süleyman b. Turgud, Yorgi v. Hristo, Ergiri v. İskarlet, Paroş v. Mihal, Yorgi v. Apostol, Mihal v. Apostol, İstarina v. Minho.