Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 75 Hüküm no: 22 Orijinal metin no: [5a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ramazan b. Receb’in menzilini İbrahim Beşe b. Mustafa’ya satması Medîne-i Ebâ Eyyûb el-Ensârî -râdiye anhu Rabbühü’l-Bârî- mahallâtından Ahmed Dede mahallesi sükkânından Ramazan b. Receb nâm kimesne meclis-i şer‘-i hatîr-i lâzımü’t-tevkīrde işbu hâmilü’l-kitâb İbrahim Beşe b. Mustafa nâm râcil mahzarında bi’t-tav‘ ve’r-rızâ ikrâr ve takrîr-i kelâm edip mahalle-i merkūmede vâki‘ bir tarafdan Ayşe Hâtun bt. ( ) mülküne ve bir tarafdan abacı İbrahim Çelebi b. ( ) mülküne ve bir tarafdan Akbaş Hâtun vakfı’na ve bir tarafdan tarîk-i hâssa müntehî olup bir tahtânî beyti ve mahzeni ve tahta-pûşu ve zât-ı eşcâr-ı müsmire ve gayr-ı müsmireyi hâvî cüneyneyi müştemil mülk menzilimi cümle-i tevâbi‘ ve levâhıkı ve kâffe-i menâfi‘ ve merâfıkı ile mezbûr İbrahim Beşe’ye altı bin beş yüz nakd-i râyic fi’l-vakt akçeye bey‘-i bâtt-ı sahîh-i şer‘î ile bey‘ edip kabz-ı semen-i ma‘dûd ve teslîm-i mebî‘-i mahdûd kıldım ba‘de’l-yevm sâlifü’l-beyân menzil-i mahdûd-ı mezkûr İbrahim Beşe’nin mülk-i müşterâ-yı sarîhidir keyfe mâ yeşâ ve yahtâr mutasarrıf olsun dedikde mukırr-ı mezbûrun vech-i meşrûh üzre cârî olan ikrâr ve takrîrin el-mukarru lehü’l-mezbûr İbrahim Beşe bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Hurrire fi’l-yevmi’s-sânî min Saferi’l-hayr li sene tis‘a ve ışrîn ve elf. Şuhûdü’l-hâl: Muslihiddin Efendi b. ( ) el-İmâm, Eyüb Halîfe b. Yunus, Ahmed b. Mehmed el-Kâtib, Mehmed b. Osman, Abdurrahman [b.] Ömer el-İmâm, Ramazan b. Hasan el-Müezzin, Mehmed Çelebi b. Mehmed el-İmâm, Ahmed Çelebi b. Mehmed, Halil b. Mehmed, Ali Ağa b. Abdullah el-Mütevellî, İbrahim b. Mehmed, Mehmed b. Hanefi, Yakub b. Kurd, Ali b. Abdullah ve gayruhüm mine’l-hâzırîn.