Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 76 Hüküm no: 24 Orijinal metin no: [5a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hüseyin b. İlyas’ın mülkünün kızları tarafından Haydar b. Abdullah ile eşi Kamer bt. Abdullah’a satılması Havâss-ı Aliyye kazâsı müzâfâtından Terkos nâhiyesine tâbi‘ Kite nâm karye sükkânından iken bundan akdem vefât eden Hüseyin b. İlyas’ın verâseti, sulbî kızları Zahide ve Rahime’ye münhasıra oldukdan sonra merkūmân taraflarından husûs-ı âti’l-beyânı ikrâra vekîl olup vekâleti hasm-ı şer‘î-i câhid mahzarında Âbid b. Kubad el-İmâm ve İbrahim Bey b. Murad el-Cündî şehâdetleri ile şer‘an sâbite ve mütehakkika olan fahrü’l-akrân Hüseyin Bey b. Hürrem nâm cündî meclis-i şer‘-i hatîr-i lâzımü’t-tevkīrde işbu hâfız-ı hâze’l-kitâb Haydar b. Abdullah nâm kimesne mahzarında bi’l-vekâle ikrâr ve takrîr-i kelâm edip işbu akdin sudûruna değin müvekkilelerim merkūmetân Zahide ve Rahime’nin ale’l-iştirâk silk-i mülk-i sahîhlerinde münselik ve münharıt olan emlâkden olup karye-i merkūmede vâki‘ bir tarafdan Hüseyin Çavuş b. ( ) mülküne ve bir tarafdan Mustafa Çavuş b. ( ) mülküne ve bir tarafdan Durak Beşe b. Ramazan mülküne ve bir tarafdan tarîk-i âma müntehî bir tahtânî beyti ve bir fevkānî beyti ve iki sundurmayı ve bir samanlığı ve zât-ı eşcâr-ı müsmire ve gayr-ı müsmireyi hâvî muhavvatayı ve bir ahırı ve menzil-i mezbûra muttasıl ve mülâsık bir mikdâr arz-ı hâliyeyi müştemil merhûm-ı mezbûrdan bi hasebi’l-irsi’ş-şer‘î intikāl eden mülk-i mevrûslarını cümle-i tevâbi‘ ve levâhıkı ile mezbûr Haydar Beşe’ye ve gāibe ani’l-meclis olup merkūm Haydar’ın zevcesi olan Kamer bt. Abdullah nâm hâtuna ale’l-iştirâki’s-seviy dört bin iki yüz elli nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ edip kabz-ı semen-i ma‘dûd ve teslîm-i mebî‘-i mahdûd kıldılar ba‘de’l-yevm sâlifü’l-beyân menzil-i mahdûd mezbûrân Haydar ve Kamer’in ale’l-iştirâk mülk-i müşterâ-yı sarîhleridir keyfe mâ yeşâân mutasarrıf olsunlar dedikde vekîl-i mezbûr Hüseyin Bey’in vech-i meşrûh üzre cârî olan ikrâr ve takrîrin el-mukarru lehü’l-merkūmân Haydar ve Kamer bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Hurrire fî selhi Muharremi’l-harâm li sene tis‘a ve ışrîn ve elf. Şuhûdü’l-hâl: Durak Beşe b. Ramazan er-Râcil, Âbid b. Kaya el-Müezzin, Mustafa b. Abdullah, Yusuf b. Abdullah, Mehmed b. Fazlullah, el-Hâc Müstedâm Bey el-Cündî Osman Bey b. Abdullah el-Cündî Zülfikār Bey b. Abdullah er-Râcil, Hüseyin Beşe b. Abdullah er-Râcil, Mehmed b. Ramazan er-Râcil, el-Hâc Hüseyin Bey el-Bevvâbü’s-sultânî ve gayruhüm mine’l-hâzırîn.