Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 80 Hüküm no: 29 Orijinal metin no: [6a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Abdi Bey b. Halil’in kölesini satmasına izin verilmesi Medîne-i Ebâ Eyyûb-i Ensârî -râdiye anhu Rabbühü’l-Bârî-’de bi’l-fi‘l za‘îmü’l-vakt olan fahrü’l-akrân Abdi Bey b. Halil nâm cündî meclis-i şer‘-i hatîr-i lâzımü’t-tevkīrde sevk-i kelâm edip işbu hâzır bi’l-meclis olan orta boylu açık kaşlı gök elâ gözlü Rûsiyyü’l-asl Yuvan b. Abdullah nâm abd işbu sene semân ve ışrîn ve elf Şevvâlü’l-mükerremi’nin yirmi altıncı [günü] ibâk ettiğine ikrârı ile Halil Beşe b. Kaya nâm râcil ahz edip kayd-ı sicil olunmuş idi hâlâ kānûn-ı pâdişâhî ve hükm-i şehinşâhî üzre zikr olunan evsâf ile mevsûf olan mezbûr Yuvan’ın müddet-i örfiyyesi tamâm olduğu ecilden kıbel-i şer‘-i kavîmden bey‘ olunmasına temessük taleb ederim dedikde sicill-i mahfûza nazar olundukda fi’l-vâki‘ abd-i mezbûrun müddeti tamâ[m] olduğu müte‘ayyin olmağın kānûn-ı münîf mûcebince mezbûr Abdi Bey’e merkūm Yuvan’ı bey‘a izin verilip işbu hurûf ber sebîli’t-temessük ketb ve imlâ olunup yed-i tâlibe def‘ ve vaz‘ olundu. Hurrire fî evâsıtı Saferi’l-hayr li sene tis‘a ve ışrîn ve elf. Şuhûdü’l-hâl: Mustafa b. Mehmed, Mehmed b. Hanefi, Süleyman b. Turgud, Ali b. Abdullah, Yakub b. Kurd, Perviz b. Abdullah ve gayruhüm mine’l-hâzırîn.