Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 86 Hüküm no: 39 Orijinal metin no: [7a-4, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İsmail Çelebi b. Ahmed’in evini istiğlâl yoluyla Abdülkâdir Efendi Vakfı’na sattığı İsmail Çelebi b. Ahmed nâm kimesne, meclis-i şer‘-i şerîf ve mahfil-i dîn-i münîfde -el-masûn ani’t-tağyîr ve’t-tahrîf- hâzır olup menzilini merhûm Abdülkādir Efendi vakfı’na mütevellî olan hâmil-i hâze’l-kitâb Hasan Efendi b. İbrahim’e bey‘ ettiğini ikrâr ve i‘tirâf etti. O da mezbûr İsmail Çelebi’nin işbu akdin kendilerinden sudûruna kadar sâhibi ve mâliki olduğu elinde ve taht-ı tasarrufunda bulundurduğu mahalle-i mezbûrede vâki‘ ve bir tarafdan bevvâb-ı sultânî Musli Çelebi b. Sadi mülkü, diğer tarafdan karındaşı Mehmed Bey mülkü, öbür tarafdan Hasan b. Alemşah mülkü ve diğer tarafdan da tarîk-i âm ile mahdûd menzil-i mezkûru cümle tevâbi‘ ve levâhıkı ve kâffe-i menâfi‘ ve merâfıkı ile râyicü’l-vakt dört bin akçe-i Osmânî semen-i mu‘ayyen-i makbûz ile ve vakf-ı mezbûr malıyla istiğlâl için iştirâ etti. Bâyi‘-i mezbûrun menzil-i merkūmu kirâlamak istemesi üzerine müşterî-yi mezbûr ba‘de’t-tahliyye ve’t-tekābuz, zeyl-i kitâbda mezkûr târihden i‘tibâren bir sene tamâmına dört yüz akçe ücret-i kirâ mukābilinde menzil-i merkūmu icâreye verdi. Mütevellî-i mezbûr vâki‘ ikrârı vicâhen ve şifâhen tasdîk etti. İmâm Abdullah b. Maden ve medyûn-ı mezbûrun annesi Canfedâ bt. Abdullah meblağ-ı mezbûra ve menzil-i mezbûrun derkine ve ücret-i kirâya îcâb ve kabûlü hâvî kefâletle kefîl oldu. Cerâ zâlike ve hurrire fi’l-yevmi’s-sâlis aşer li târihi’l-mezbûr. Şuhûdü’l-hâl: Hüsam Efendi el-Mu‘allim, Hüseyin b. Mehmed el-Müezzin, Sunullah b. Siyâmi el-İmâm, Mahmud Çelebi b. İlyas, Mehmed b. Hayreddin, Mustafa b. Veli, Mehmed b. Mustafa