Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 88 Hüküm no: 41 Orijinal metin no: [7b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Velisari v. Manol’ün yel değirmeni hissesini Trandafil v. Kosta’ya satması Vilâyet-i Rumeli’nde Kavala sancağında nefs-i kazâ-i İmroz mahallâtından Aya Yorgi demekle ma‘rûf mahalle sâkinlerinden Velisari v. Manol nâm zimmî meclis-i şer‘-i hatîr-i lâzımü’t-tevkīrde işbu hâmil-i hâze’l-kitâb Trandafil v. Kosta nâm zimmî muvâcehesinde bi’t-tav‘ ve’r-rızâ ikrâr ve takrîr-i kelâm edip kazâ-i mezbûr kurbunda Ikrimilye demekle ma‘rûf mevzi‘de vâki‘ bir göz mülk yel değirmeninden bana isâbet eden nısf hisse-i şâyi‘amı cümle-i tevâbi‘ ve levâhıkı ve kâffe-i menâfi‘ ve merâfıkı ile mesfûr Trandafil’e bin nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ edip kabz-ı semen eyledim ba‘de’l-yevm sâlifü’l-beyân değirmenden bana isâbet eden nısf hisse-i şâyi‘am mezbûr Trandafil’in mülk-i müşterâ-yı sarîhidir keyfe mâ yeşâ ve hasbe mâ yürîd mutasarrıf olsun dedikde mukırr-ı mezbûrun vech-i mübeyyen üzre cârî olan ikrâr ve takrîrin el-mukarru lehü’l-mezbûr Trandafil bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Hurrire fi’l-yevmi’l-hâmis aşer min Saferi’l-hayr li sene tis‘a ve ışrîn ba‘de’l-elf. Şuhûdü’l-hâl: Mustafa b. Mehmed, Ali b. Abdullah, Süleyman b. Turgud, Yakub b. Kurd, Ahmed b. Abdullah, Mihal [v.] Lika, Panayot [v.] Pavdi, Teri v. Kori, Hristodili [v.] Kosta, Manol v. Karitkoz, Dimitri [v.] Kosta, Sobani v. Panayot, Minho v. Yani, Mihal v. Dimitri.