Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 88 Hüküm no: 42 Orijinal metin no: [7b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kiryazi v. Nikola’nın menzili ile bazı hayvanlarını oğlu Mehmed Beşe’ye satıp tarlalarının da kullanım hakkını devretmesi Havâss-ı Sultâniyye kazâsı müzâfâtından kasaba-i Büyükçekmece’ye tâbi‘ Bojdar demekle ma‘rûf karyeden Kiryazi v. Nikola nâm zimmî meclis-i şer‘-i hatîr-i lâzımü’t-tevkīrde işbu bâ‘is-i hâze’l-kitâb sarây-ı atîk-i sultânî teberdârlarından olup sulbî oğlu Mehmed Beşe nâm mühendis mahzarında bi’t-tav‘ ve’r-rızâ ikrâr ve takrîr-i kelâm edip karye-i merkūmede vâki‘ bir tarafdan Hamza Beşe b. Abdullah mülküne ve bir tarafdan Mahmud Beşe b. Abdullah mülküne ve iki tarafdan tarîk-i âma müntehî üç fevkānî beyti ve bir ahırı müştemil mülk menzilimi ve beynimizde vasfı ve cinsi ilm-i şer‘î birle ma‘lûm altı re’s hayvânâtı cümle-i tevâbi‘ ve levâhıkı ve kâffe-i menâfi‘ ve merâfıkı ile mesfûr Mehmed Beşe’ye on bin nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ edip ve kabz-ı semen-i ma‘dûd ve teslîm-i mebî‘ât eylediğimden sonra yine karye-i merkūme sınırında mevâzi‘-i adîdede vâki‘ her biri inde ahâliyi’d-diyâr ma‘lûmü’l-hudûd ve’l-mikdâr tahmînen bir müd tohum istî‘âb eder mutasarrıf olduğum dört kıt‘a tarlanın hakk-ı tasarrufunu dahi sâhib-i arz ma‘rifetiyle mezbûr Mehmed Beşe’ye tefvîz edip ol dahi tefevvüz ve kabûl ettikden sonra mukābele-i tefvîzde olan iki bin nakd-i mezbûrü’n-na‘t akçeyi mezbûr Mehmed Beşe yedinden bi’t-tamâm ve’l-kemâl ahz ve kabz eyledim ba‘de’l-yevm sâlifü’l-beyân menzil-i mahdûd ve altı re’s hayvânât mezkûr Mehmed Beşe’nin mülk-i müşterâ-yı sarîhidir ve mârrü’z-zikr dört kıt‘a tarlanın hakk-ı tasarrufu dahi mersûmundur sâir emsâli tasarrufu gibi keyfe mâ yeşâ ve hasbe mâ yürîd mutasarrıf olsun dedikde mukırr-ı mezbûrun vech-i mübeyyen üzre cârî olan ikrâr ve takrîrin el-mukarru lehü’l-merkūm Mehmed Beşe bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb ve imlâ olundu. Hurrire fî 14 li târihi’l-mezbûr. Şuhûdü’l-hâl: Mustafa Ağa b. Abdullah Kethüdâ-yı bevvâbân-ı sarây-ı atîk, Ahmed Bey b. Mehmed el-Kâtib, İsmail Bey b. Hasan el-Bevvâbü’s-sultânî, Mehmed Bey b. Ahmed el-Bevvâbü’s-sultânî, Hüseyin Bey b. Abdullah el-Bevvâbü’s-sultânî, Emrullah Bey b. Pîrî el-Bevvâbü’s-sultânî, Ali Bey b. ( ) el-Bevvâbü’s-sultânî, Mustafa b. Abdullah an zümre-i teberdârân, Süleyman b. Abdullah el-Bevvâbü’s-sultânî, Mehmed b. Hanefi, Mustafa b. Mehmed, Ali b. Abdullah, Yakub b. Kurd, Süleyman b. Turgud ve gayruhüm.