Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 89 Hüküm no: 43 Orijinal metin no: [8a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Ali’nin diyeti hususunda dayısı Hüseyin b. Hasan’ın suçsuz oldukları anlaşılan Hasköy ahalisinin zimmetini ibra etmesi Karye-i Galata tevâbi‘inden nefs-i kasaba-i Kasımpaşa-yı Cezerî mahallâtından Kulaksız mahallesi sükkânından iken bundan akdem Okmeydanı demekle ma‘rûf mevzi‘de mezbûhan maktûl olan Mehmed b. Ali nâm kimesnenin dayısı ve bi’l-inhisâr vâris-i ma‘rûfu olan Hüseyin b. Hasan nâm kimesne meclis-i şer‘-i hatîr-i lâzımü’t-tevkīrde Havâss-ı Sultâniyye kazâsı tevâbi‘inden nefs-i Hasköy ahâlîsinden Mustafa b. Surûrî ve Yakub b. Aydın ve Ahmed b. Abdullah ve el-Hâc İbrahim b. Yusuf ve Mercan b. Abdullah nâm kimesneler ve sâirleri mahzarlarında bi’t-tav‘ ve’r-rızâ ikrâr ve takrîr-i kelâm edip maktûl-i mezbûr Mehmed’in mezbûhan katl olunduğu mevzi‘-i mezbûr karye-i merkūmeye karîb olmağın kātili karye-i merkūmeden olmak ihtimâli ile bu âna gelince mezbûrun dem ve diyetine müte‘allik karye-i merkūme ahâlîsi ile da‘vâ ve nizâ‘ üzre idim el-hâletü hâzihî maktûl-i merkūmun kātili mücellidlik san‘atında üstâdı olup kasaba-i mezbûrede sâkin Yusuf b. Abdullah nâm kimesne idiği ma‘lûmum olduğu ecilden husûs-ı mezbûra müte‘allik cemî‘ da‘vâdan karye-i merkūme ahâlîsinin zimmetlerini ibrâ-i âmla ibrâ ve iskāt-ı tâmla iskāt eyledim ba‘de’l-yevm husûs-ı merkūma müte‘allik karye-i merkūme ahâlîsi ile kat‘â da‘vâ ve nizâ‘ım yokdur dedikde mukırr-ı mezbûrun vech-i meşrûh üzre cârî olan ikrâr ve takrîrin karye-i merkūme ahâlîsi her biri bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Hurrire fî evâsıtı Saferi’l-hayr li sene tis‘a ve ışrîn ve elf. Şuhûdü’l-hâl: Mustafa b. Mehmed, Mehmed b. Hanefi, Ali b. Abdullah, Süleyman b. Turgud, Yakub b. Kurd, Perviz b. Abdullah, Osman b. Hasan ve gayruhüm mine’l-hâzırîn.