Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 90 Hüküm no: 44 Orijinal metin no: [8a-2, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Peraniçe bt. Piyazi’nin evini Bâli Hâce Vakfı’na istiğlâl yoluyla sattığı Mahmiye-i Havâss-ı Kostantıniyye müzâfâtından Avasya karyesinden Peraniçe bt. Piyazi nâm nasrâniye meclis-i şer‘-i şerîf ve mahfil-i dîn-i münîfde -el-masûn ani’t-tağyîr ve’t-tahrîf- hâzır olup menzilini merhûm Bâli Hâce vakfı’na mütevellî olan hâmil-i hâze’l-kitâb Solak Mehmed Bey b. Mustafa’ya bey‘ ettiğini ikrâr ve i‘tirâf etti. Mütevellî-i mezbûr da zimmiye-i mesfûrenin işbu akdin kendilerinden sudûruna kadar sâhibi ve mâliki olduğu elinde ve taht-ı tasarrufunda bulundurduğu karye-i merkūmede kâin, bir tarafdan zimmî Nikola mülkü, diğer tarafdan zimmî Petro mülkü, öbür tarafdan kilise ve diğer tarafdan da tarîk-i âm ile mahdûd menzili cümle tevâbi‘ ve levâhıkı ve kâffe-i menâfi‘ ve merâfıkı ile râyicü’l-vakt beş bin akçe-i Osmânî semen-i mu‘ayyen-i makbûz ile vakf-ı mezbûr malıyla ve istiğlâl için iştirâ etti. Bâyi‘a-i mezbûrenin menzil-i merkūmu kirâlamak istemesi üzerine müşterî-yi mezbûr ba‘de’t-tahliyye ve’t-tekābuz, zeyl-i kitâbda mezkûr târihden i‘tibâren bir sene tamâmına beş yüz akçe ücret-i kirâ mukābilinde menzil-i merkūmu icâreye verdi. Mütevellî-i mezbûr vâki‘ ikrârı vicâhen ve şifâhen tasdîk etti. Cerâ zâlike ve hurrire fi’l-yevmi’l-hâmis aşer min Saferi’l-hayr sene tis‘a ve ışrîn ve elf. Şuhûdü’l-hâl: Halil b. Mehmed, Abdülaziz b. Cafer, Mehmed b. Mehmed, Mehmed b. Abdullah, Mustafa b. Mehmed, Mehmed b. Hanefi, Süleyman b. Turgud ve gayruhüm mine’l-hâzırîn.