Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 91 Hüküm no: 45 Orijinal metin no: [8a-3, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Lâlezar Hâtun bt. Abdullah’ın evini Abdülkâdir Efendi Vakfı’na istiğlâl yoluyla sattığı Ebâ Eyyûb el-Ensârî -radiye anhu Rabbühü’l-Bârî- mahallâtından Uluca baba mahallesinde sâkine olan Lâlezar Hâtun bt. Abdullah meclis-i şer‘-i şerîf ve mahfil-i dîn-i münîfde -el-masûn ani’t-tağyîr ve’t-tahrîf- hâzır olup menzilini medîne-i merkūmede vâki‘ merhûm Abdülkādir Efendi vakfı’na mütevellî olan hâmil-i hâze’l-kitâb Hasan Efendi b. İbrahim’e bey‘ ettiğini ikrâr ve i‘tirâf etti. Mütevellî-i mezbûr da Lâlezar Hâtun’un işbu akdin kendilerinden sudûruna kadar sâhibi ve mâliki olduğu elinde ve taht-ı tasarrufunda bulundurduğu mahalle-i merkūmede vâki‘ ve bir tarafdan Mahmud Çavuş vakfı, diğer tarafdan kayyım Mustafa mülkü, iki tarafdan da tarîk-i âm ile mahdûd menzili cümle tevâbi‘ ve levâhıkı ve kâffe-i menâfi‘ ve merâfıkı ile râyicü’l-vakt iki bin beş yüz akçe-i Osmânî semen-i mu‘ayyen-i makbûz ile vakf-ı mezbûr malıyla ve istiğlâl için iştirâ etti. Bâyi‘a-i mezbûrenin menzil-i merkūmu kirâlamak istemesi üzerine müşterî-yi mezbûr ba‘de’t-tahliyye ve’t-tekābuz, zeyl-i kitâbda mezkûr târihden i‘tibâren üç sene tamâmına dokuz yüz altmış altı akçe ücret-i kirâ mukābilinde menzil-i merkūmu icâreye verdi. Mütevellî-i mezbûr vâki‘ ikrârı vicâhen ve şifâhen tasdîk etti. Mukırra-i mezbûrenin oğlu Mehmed b. Budak menzil-i mezbûrun derkine, ücret-i kirâya ve asl-ı meblağ-ı mersûma îcâb ve kabûlü hâvî kefâletle kefîl oldu. Cerâ zâlike ve hurrire fi’l-yevmi’l-hâmis aşer min Saferi’l-hayr li târihi’l-mezbûr. Şuhûdü’l-hâl: Mustafa b. Mehmed, Süleyman b. Turgud, Mahmud Çelebi en-Nâzır, Yakub b. Kurd, Mehmed b. Hanefi, Ali b. Abdullah, Mehmed b. Hasan