Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 92 Hüküm no: 47 Orijinal metin no: [8b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Zakino bt. Zoto’nun yarım menzil hissesini Virtoz v. Nikola’ya satması Vilâyet-i Rumeli’nde Avlonya sancağında Ergiri kazâsına tâbi‘ Küçükdelvineli demekle ma‘rûf karye sâkinlerinden iken bundan akdem Havâss-ı Aliyye kazâsı kurbunda taşlık nâm mevzi‘de müfâceeten mürd olan Zoto v. (…) sulbiye kebîre kızı olup hâlâ karye-i merkūmede sâkine Zakino bt. Zoto nâm nasrâniye tarafından husûs-ı âti’l-beyâna vekîl olunan Koçi v. Papakoma nâm zimmî meclis-i şer‘-i hatîr-i lâzımü’t-tevkīrde işbu râfi‘ü hâze’l-kitâb Virtoz v. Nikola nâm zimmî muvâcehesinde bi’l-vekâle ikrâr ve takrîr-i kelâm edip Havâss-ı Aliyye kazâsı müzâfâtından Küçükçekmece’ye tâbi‘ Makrihorya nâm karyede vâki‘ iki tarafdan Manol v. Toma mülküne ve bir tarafdan Dimitri v. ( ) mülküne ve bir tarafdan Zafire bt. Apostol mülküne müntehî olup iki fevkānî beyti ve bir ahırı ve zât-ı eşcâr-ı müsmire ve gayr-ı müsmireyi hâvî muhavvatayı müştemil menzilden bi hasebi’l-irsi’ş-şer‘î mürd-i mezbûrdan intikāl eden nısf hisse-i şâyi‘amı cümle-i tevâbi‘ ve levâhıkı ve kâffe-i menâfi‘ ve merâfıkı ile mezbûr Virtoz’a üç bin nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ edip kabz-ı semen-i ma‘dûd ve teslîm-i mebî‘-i mahdûd kıldım ba‘de’l-yevm sâlifü’l-[beyân] menzil-i mahdûddan müvekkilem mezbûre Zakino’ya isâbet eden nısf hisse-i mevrûsesi mezbûre Virtoz’un mülk-i müşterâ-yı sarîhidir keyfe mâ yeşâ ve yahtâr mutasarrıf olsun dedikde vekîl-i mezbûr minvâl-i muharrer üzre cârî olan ikrâr ve takrîrin el-mukarru lehü’l-mezbûr Virtoz bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Hurrire fi’l-yevmi’s-sâlis min Zilhicceti’ş-şerîfe li sene semân ve ışrîn ba‘de’l-elf. Şuhûdü’l-hâl: Mustafa Beşe b. Abdullah er-Râcil, Mehmed Beşe b. Abdullah er-Râcil, Mustafa b. Mehmed, Yakub b. Kurd, Ali b. Abdullah, Papa Yani [v.] Aleksi, Nikola [v.] Köni, Yani [v.] İstati, Mihal [v.] İstati ve gayruhüm mine’l-hâzırîn.