Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 93 Hüküm no: 48 Orijinal metin no: [8b-2, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Ağa b. Mustafa’nın evini Seyyid Mustafa Çelebi Vakfı’na istiğlâl yoluyla sattığı Ebâ Eyyûb el-Ensârî -radiye anhu Rabbühü’l-Bârî- mahallâtından Takyecibaşı mahallesinde sâkin olan Hasan Ağa b. Mustafa nâm kimesne meclis-i şer‘-i şerîfde hâzır olup menzilini Seyyid Mustafa Çelebi vakfı’na mütevellî olan hâmil-i hâze’l-kitâb Fazlullah b. el-Hâc Ali’ye bey‘ ettiğini ikrâr ve i‘tirâf etti. O da vakf-ı mezbûr malıyla ve istiğlâl için mezbûr Hasan Ağa’nın iş bu akdin kendilerinden sudûruna kadar sâhibi ve mâliki olduğu elinde ve taht-ı tasarrufunda bulundurduğu mahalle-i mezbûrede vâki‘ olup bir tarafdan bâyi‘-i mezkûr mülkü, öbür tarafdan el-Hâc Ali vakfı, diğer tarafdan Sitti Hâtun mülkü ve diğer tarafdan da tarîk-i âmla mahdûd olan menzil-i mezbûru cümle tevâbi‘ ve levâhıkı ve kâffe-i menâfi‘ ve levâhıkı ile râyicü’l-vakt on iki bin akçe-i Osmânî semen-i mu‘ayyen-i makbûzla andan iştirâ etti. Bâyi‘-i mezbûrun menzil-i merkūmu kirâlamak istemesi üzerine müşterî-yi mezbûr ba‘de’t-tahliyye ve’t-tekābuz, zeyl-i kitâbda mezkûr târihden i‘tibâren bir sene tamâmına iki bin akçe ücret-i kirâ mukābilinde menzil-i merkūmu icâreye verdi. Mütevellî-i mezbûr vâki‘ ikrârı vicâhen ve şifâhen tasdîk etti. ( ) menzil-i mezbûrun derkine, ücret-i kirâya ve asl-ı meblağ-ı mersûma îcâb ve kabûlü hâvî kefâletle kefîl oldu. Cerâ zâlike ve hurrire fi’l-yevmi’s-sâbi‘ min şehri Saferi’l-hayr li târihi’l-mezbûr. Şuhûdü’l-hâl: El-Hâc Receb b. Yunus, Ahmed Efendi b. İbrahim, Veli b. Abdullah, Muslihiddin b. Hayrullah, Turgud Halîfe b. Durak, Musli Çelebi b. Hasan, Mustafa b. Mehmed, Mehmed b. Hanefi, Süleyman b. Turgud ve gayruhüm mine’l-hâzırîn.