Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 93 Hüküm no: 49 Orijinal metin no: [8b-3, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Emine bt. Abdullah’ın evini Emânî Çelebi Vakfı’na istiğlâl yoluyla sattığı Mahmiye-i Kostantıniyye sur kapılarından Yenikapı hâricinde vâki‘ Emânî Çelebi mahallesinde sâkine olan Emine bt. Abdullah nâm hâtun kıbelinden âtiyyü’z-zikr menzilin bey‘ ve îcârına vekâleti kendisini ma‘rifet-i şer‘iyye ile ârifân olan imâm İbrahim Halîfe b. Burhan ve İbrahim b. Abdullah’ın şehâdetleri ile sâbit olan Solak Sefer Bey b. Abdullah nâm kimesne meclis-i şer‘-i şerîfde vekâlet-i mahkiyesi hasebiyle menzil-i mezkûru hâmil-i hâze’l-kitâb merhûm Emânî Çelebi vakfı’na mütevellî olan Receb Halîfe b. Ahmed’e bey‘ ettiğini ikrâr ve i‘tirâf etti. O da vakf-ı mezbûr malıyla ve istiğlâl için mezbûre Emine Hâtun’un iş bu akdin kendilerinden sudûruna kadar sâhibi ve mâliki olduğu elinde ve taht-ı tasarrufunda bulundurduğu mahalle-i mezbûrede vâki‘ olup bir tarafdan Çerkez (…) deyû meşhûr kimesne mülkü, diğer tarafdan Musli Çelebi mülkü, öbür tarafdan Emine bt. Ahmed mülkü ve diğer tarafdan da tarîk-i âm ile mahdûd olan menzilini cümle tevâbi‘ ve levâhıkı ve kâffe-i menâfi‘ ve merâfıkı ile râyicü’l-vakt iki bin akçe semen-i mu‘ayyen-i makbûzla andan iştirâ etti. Bâyi‘a-i mezbûrenin menzil-i merkūmu kirâlamak istemesi üzerine müşterî-yi mezbûr ba‘de’t-tahliyye ve’t-tekābuz, zeyilde mezkûr senenin gurre-i Muharrem-i harâmından bir sene tamâmına iki yüz akçe ücret-i kirâ mukābilinde menzil-i merkūmu icâreye verdi. Mütevellî-i mezbûr vâki‘ ikrârı vicâhen ve şifâhen tasdîk etti. Cerâ zâlike ve hurrire fi’l-yevmi’s-sâlis aşer min Saferi’l-hayr li târihi’l-mezbûr. Şuhûdü’l-hâl: Ali Efendi b. Ahmed el-Hatîb, Ahmed Halîfe b. Süleyman el-İmâm, Mehmed Halîfe b. Perviz el-Müezzin, Mehmed b. Abdullah er-Râcil, Abdi b. Mustafa, Mustafa b. Mehmed, Mehmed b. Hanefi, Yakub b. Kurd, Ali b. Abdullah ve gayruhüm mine’l-hâzırîn.