Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 97 Hüküm no: 56 Orijinal metin no: [9b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Andriye v. Todori’nin tarlalarının kullanım hakkını Hristo v. Nikola’ya devretmesi Vilâyet-i Rumeli’nde İnebahtı sancağında Yenişehir kazâsı müzâfâtından Fener nâhiyesine tâbi‘ Kaliçino nâm karye [sâkinlerinden] Andriye v. Todori nâm zimmî meclis-i şer‘de işbu hâmilü’l-kitâb yine nâhiye-i mezbûreye tâbi‘ Tomyani nâm karyeden Hristo v. Nikola nâm zimmî muvâcehesinde bi’t-tav‘ ve’r-rızâ ikrâr ve takrîr-i kelâm edip karye-i merkūme kurbunda vâki‘ bir tarafdan Yorgi v. ( ) tarlasına ve bir tarafdan Dimitri v. Malkoç tarlasına ve bir tarafdan Kosta v. Malkoç tarlasına ve bir tarafdan yine müşterî-i mezbûr Hristo tarlasına müntehî ve mahdûd olup tahmînen diyârımız keyli ile on keyl tohum istî‘âb eder bir kıt‘a tarlanın hakk-ı tasarrufunu sâhib-i arz ma‘rifetiyle mezbûr Hristo’ya tefvîz edip ol dahi minvâl-i muharrer üzre tefevvüz ve kabûl ettikden sonra mukābele-i tefvîzde olan beş bin yüz nakd-i fıddî-i Osmânî râyic fi’l-vakt akçeyi mezbûr Hristo yedinden bi’t-tamâm ve’l-kemâl ahz ve kabz eyledim ba‘de’l-yevm sâlifü’l-beyân hudûd ile mahdûd olan tarlanın hakk-ı tasarrufu mersûmundur sâir emsâli tasarrufu gibi mutasarrıf olsun dedikde mukırr-ı mezbûrun vech-i mübeyyen üzre cârî olan ikrâr ve takrîrin el-mukarru lehü’l-mezbûr Hristo bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Hurrire fî evâhiri Saferi’l-hayr li sene tis‘a ve ışrîn ba‘de’l-elf. Şuhûdü’l-hâl: Mustafa b. Mehmed, Mehmed b. Hanefi, Süleyman b. Turgud, Yakub b. Kurd, Ali b. Abdullah, İsteryani [v.] Harke, Dimitri [v.] Dereno, Dimitri v. Nikola, Foti v. Nikola, Şadilo [v.] İstati, Dimitri v. Zakar ve gayruhüm mine’l-hâzırîn.