Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 99 Hüküm no: 58 Orijinal metin no: [9b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rizo v. Taci’nin tarlasının kullanım hakkını İstiranik v. Yorgi’ye devretmesi Vilâyet-i Rumeli’nde Yenişehir kazâsı müzâfâtından Fener kazâsına tâbi‘ Viraçe nâm karye sâkinlerinden Rizo v. Taci nâm zimmî meclis-i şer‘-i hatîr-i lâzımü’t-tevkīrde işbu hâmil-i hâze’l-kitâb İstiranik v. Yorgi nâm zimmî mahzarında bi’t-tav‘ ve’r-rızâ ikrâr ve i‘tirâf edip karye-i mezbûre sınırında vâki‘ bir tarafı Yani v. Yorgi tarlasına ve bir tarafı Nikola v. Kabili tarlasına ve bir tarafı Nikola v. Rizo tarlasına ve bir tarafı dereye müntehî taht-ı tasarrufumda olup tahmînen diyârımız keyli ile üç keyl tohum istî‘âb eder bir kıt‘a tarlanın hakk-ı tasarrufunu sâhib-i arz ma‘rifetiyle merkūm İstiranik’e tefvîz edip ol dahi tefevvüz ve kabûl ettiğinden sonra mukābele-i tefvîzde olan yirmi dört bin altı yüz nakd-i râyic fi’l-vakt akçeyi yedinden ahz ve kabz eyledim ba‘de’l-yevm sâlifü’l-beyân tarlanın hakk-ı tasarrufu merkūmundur, sâir emsâli tasarrufu gibi keyfe mâ yeşâ ve yahtâr mutasarrıf olsun dedikde mukırr-ı mezbûrun vech-i mübeyyen üzre cârî olan ikrâr ve takrîrin el-mukarru lehü’l-mezbûr İstiranik bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Hurrire fî gurreti Rebî‘ilevvel li târihi’l-mezbûr. Şuhûdü’l-hâl: Mustafa b. Mehmed, Yakub b. Kurd, Dimitri v. Komyani, Anastas v. Nikola, Angilaki v. İstemad, İstati v. Dimitri, Kirici v. Dimitri, Yani v. Todori, Panayoti v. Piratiki, Yorgi v. Zervane, Apostol v. İstati ve gayruhüm mine’l-hâzırîn.