Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 99 Hüküm no: 59 Orijinal metin no: [9b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Dimo’nun oğulları Kiraste ve Lipo’nun bazı emlâk ve ağaçlarını Hristo v. Minho’ya satmaları Vilâyet-i Rumeli’nde Avlonya sancağında Ergirikasrı kazâsına tâbi‘ Sarakiste demekle ma‘rûf karye sâkinelerinden Kiraste ve Lipo bintey Dimo nâm nasrâniyeler taraflarından husûs-ı âti’l-beyânı bey‘ ve kabz-ı semene vekîl olup vekâleti hasm-ı şer‘î-i câhid mahzarında Pano v. Yorgo ve Kiryo v. Niko nâm zimmîler şehâdetleri ile şer‘an sâbite olan Yorgo v. Dimo nâm zimmî meclis-i şer‘-i hatîr-i lâzımü’t-tevkīrde işbu hâmilü’l-kitâb Hristo v. Minho nâm zimmî muvâcehesinde bi’l-vekâle ikrâr ve takrîr-i kelâm edip karye-i merkūmede vâki‘ müvekkilelerim merkūmetân Kiraste ve Lipo nâm nasrâniyelerin silk-i mülk-i sahîhlerinde münselik olup bir tarafdan yine müşterî-i mezbûr Hristo mülküne ve bir tarafdan Korto v. Yorgo mülküne ve iki tarafdan tarîk-i âma müntehî ve mahdûd mülk menzillerini ve yine karye-i merkūme bağları dâhilinde vâki‘ her biri inde ahâliyi’d-diyâr ma‘lûmü’l-hudûd ve’l-mikdâr tahmînen on çapalık iki kıt‘a mülk bağlarını cümle-i tevâbi‘ ve levâhıkı ve kâffe-i menâfi‘ ve merâfıkı ile ve mevâzi‘-i müteferrikada vâki‘ yirmi beş dip dut eşcârlarını dahi bi safkatin vâhidetin mezbûr Hristo’ya vekâlet-i mahkiyem [hasebiyle] on dört bin üç yüz elli nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ ve kabz-ı semen-i ma‘dûd edip mebî‘ât-ı mezkûrâtı mahallinde [10a] kabza müşterî-i merkūmu taslît eyledim ba‘de’l-yevm sâlifü’l-beyân mebî‘ât mezkûr Hristo’nun mülk-i müşterâ-yı sarîhidir keyfe mâ yeşâ ve yahtâr mutasarrıf olsun dedikde vekîl-i mezbûrun vech-i mübeyyen üzre cârî olan ikrâr ve takrîrin el-mukarru lehü’l-mezbûr Hristo bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Hurrire fi’l-yevmi’t-tâsi‘ ve’l-ışrîn min Saferi’l-hayr li sene tis‘a ve ışrîn ve elf. Şuhûdü’l-hâl: Mustafa b. Mehmed, Mehmed b. Hanefi, Yakub b. Kurd, Süleyman b. Turgud, Ahmed b. Mehmed, Yusuf b. Abdullah, Dedo v. Kini, Sago v. Maranko, Duka v. Dedo, Dedo v. Kiryo, Pakü v. Kiro, Yani v. Yorgo, Duka v. Minho.