Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 100 Hüküm no: 60 Orijinal metin no: [10a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. 1029 senesi fıçı ve varil tahtası mukâtaası iltizamının Diyani v. Dimo’ya ihale edilmesi Bi’l-fi‘l fıçı ve varil tahtası mukāta‘asına ber vech-i emânet mültezim olan Yasef v. Yahuda nâm zimmî meclis-i şer‘-i hatîr-i lâzımü’t-tevkīrde işbu hâmil-i hâze’l-kitâb Vize sancağında vâki‘ Saray kazâsına tâbi‘ Istıranca nâm karye sâkinlerinden Diyani v. Dimo nâm zimmî mahzarında bi’t-tav‘ ve’r-rızâ ikrâr ve takrîr-i kelâm edip taht-ı iltizâmımda vâki‘ Hâslar kazâsında ve Silivri’de ve Vize ve Çirmen sancaklarında ve mahmiye-i Edirne ve Dimodoka [Dimetoka] ve Enez’de ve Karadeniz’de olan yalılarda vâki‘ Aydos ve Misivri ve Ahyolu kazâlarında vâki‘ re‘âyâ tâifesi üzerlerinde bin yirmi dokuz senesinde vâki‘ fıçı resmi ve kat‘-ı elvâh resmini merkūm Diyani’ye ber vech-i maktû‘ sene tamâmına varınca yirmi altı bin akçeye der-uhde eyledim ol dahi minvâl-i muharrer üzre iltizâm ve kabûl eyledi yedinde olan sûret-i emr-i celîlü’l-kadr mûcebince mutasarrıf olup ba‘de tamâmi’s-sene meblağ-ı mezbûru bi’t-tamâm ve’l-kemâl edâ eyleye dedikde mukırr-ı mezbûrun vech-i meşrûh üzre cârî olan ikrâr ve takrîrin el-mukarru lehü’l-mezbûr Diyani bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Hurrire fî gurreti Rebî‘ilevvel li târihi’l-mezbûr. Şuhûdü’l-hâl: Hasan Efendi b. İbrahim, Perviz b. Abdullah, Süleyman b. Turgud, Yakub b. Kurd, Mustafa b. Mehmed, Ali b. Abdullah, Mehmed b. Hanefi ve gayruhüm.