Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 101 Hüküm no: 61 Orijinal metin no: [10a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Diyani v. Dimo’nun temin edeceği tahta bedeli olarak aldığı paraya karşılık olarak Yasef v. Yahuda’ya menzilini rehin vermesi Vilâyet-i Rumeli’nde vâki‘ Vize sancağı müzâfâtından Saray kazâsına tâbi‘ Istıranca nâm karye sâkinlerinden Diyani v. Dimo nâm zimmî meclis-i şer‘de Tersâne-i âmire mühimmâtından olan varil ve fıçı tahtası mukāta‘asına ber vech-i iltizâm emîn olan Yasef v. Yahuda nâm zimmî mahzarında bi’t-tav‘ ve’r-rızâ ikrâr ve takrîr-i kelâm edip işbu sene tis‘a ve ışrîn ve elf târihinde vâki‘ donanma-yı hümâyûn varilleri için târih-i kitâbdan doksan güne dek Yeniada limanı’na Midye kazâsından ve İznikmid ve tev[âbi‘i] kazâlarından kat‘ edip mezbûr limana indirmek üzre yirmi bin tahta için merkūm Yasef yedinden on sekiz bin nakid akçe ahz edip ve mukābele-i meblağ-ı mezbûrda karye-i merkūmede vâki‘ bir tarafı Yorgi v. Köse mülküne ve bir tarafı Andriye v. ( ) mülküne ve bir tarafı Yorgi Papas mülküne ve bir tarafı tarîk-i âma müntehî olup cevânib-i erba‘ası sofalı bir fevkānî beyti ve bir bahçe-i müştemil mülk menzilimi rehin vaz‘ eyledim müddet-i mezbûrede tahtaları indirip teslîm etmezsem zikr olunan mülkümü mezbûr Yasef bey‘ edip semenini ahz eylemek üzre tevkîl-i devrî ile vekîl eyledim dedikde mukırr-ı mezbûrun vech-i mübeyyen üzre cârî olan ikrâr ve takrîrin el-mukarru lehü’l-mezbûr Yasef bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Hurrire fi’t-târih. Şuhûdü’l-hâl: Mustafa Beşe Çukadâr, Mehmed b. Hanefi, Mehmed b. Mansur er-Râcil, Kurd Beşe b. Abdullah er-Râcil, Aydın Beşe b. Abdullah er-Râcil, Hasan Efendi b. İbrahim, Süleyman b. Turgud ve gayruhüm.