Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 167 Hüküm no: 127 Orijinal metin no: [17a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Karabit v. Kirakor’un tasarrufundaki tarlalarına el konulduğu ile ilgili iddiasının asılsız olduğu Efendi hazretleri imzâsıyla Vilâyet-i Anadolu’da Divriği kazâsına tâbi‘ Mekrinoz? nâm karye ahâlîsinden Karabit v. Kirakor nâm Ermeni meclis-i şer‘-i hatîr-i lâzımü’t-tevkīrde karye-i mezbûre ahâlîsinden olup kendiler tarafından asîller ve yine karye-i mezbûre ahâlîsinden Arakil v. Varan ve Küçük v. Ferhad ve Kübük v. Baran ve Baron v. Dadar nâm Ermeniler taraflarından husûs-ı âti’l-beyâna sâbitü’l-vekâle vekîller olup zikirleri câ’î tarlalara vaz‘-ı yedleri sâbit olan ashâbü’l-vesîka Arakil v. Marat ve Danik v. Dadar ve Toros v. Serkis ve Manuk v. Bâli nâm Ermeniler muvâcehelerinde üzerlerine da‘vâ edip karye-i mezbûrede vâki‘ bir tarafdan İbrahim Ağa tarlası ve bir tarafdan çay ve bir tarafdan Kurdoğlu tarlası ve bir tarafdan tarîk-i âm ile mahdûd bir kıt‘a ve yine karye-i mezbûre sınırında Kesme Deresi’nde vâki‘ bir tarafdan Ecanisoğlu Agya tarlası ve bir tarafdan Babekoğlu zimmî tarlası ve bir tarafdan çay ve bir tarafdan yine kendi bağım ile mahdûd bir kıt‘a debbâğ altında vâki‘ bir tarafdan hark ve bir tarafdan kendi bağım ve bir tarafdan çay ve bir tarafdan tarîk-i âm ile mahdûd bir kıt‘a bu cümle üç kıt‘a tarlamı mezbûrlar nâ-hak vaz‘-ı yed ederler suâl olunup kasr-ı yedlerine tenbîh olunmak murâdımdır dedikde, gıbbe’s-suâl mezbûrûn Arakil ve Danik ve Toros ve Manuk cevâblarında müdde‘î-i mezbûr Karabit bin yetmiş dört senesi Zilka‘desi’nin altıncı günü zikr olunan üç kıt‘a tarlasının hakk-ı tasarruflarını ma‘rifet-i sâhib-i arz ile bi safkatin iki yüz altmış kıt‘a riyâlî guruş mukābelesinde bizim ile müvekkillerimize ferâğ ve tefvîz biz dahi tefevvuz ve kabûl eylediğimizden sonra mezbûr Karabit bedel-i merkūm iki yüz altmış kıt‘a riyâlî guruşu yine bizim ile müvekkillerimize yedimizde olan hüccet-i şer‘iyye mûcebince deyni olan iki yüz altmış kıt‘a mezbûrü’n-na‘t guruşa takās biz dahi mukāssa ve kabûl edip hattâ mezbûr Karabit husûs-ı mezbûru Müslimîn ve Ermeniler huzûrunda ikrâr ve i‘tirâf dahi etmeğin ol tarlalar hakk-ı müfevvazım olduğuna binâen vaz‘-ı yed eder deyicek gıbbe’l-istintâk ve’l-inkâr mezbûrûn Ermenilerden takrîrlerine muvâfıka beyyine taleb olundukda udûl-i müslimînden Mehmed b. Abdullah nâm kimesne ile Kiryak v. Bergos nâm Ermeni li ecli’ş-şehâde meclis-i şer‘-i şerîfe hâzırân olup isre’l-istişhâd fi’l-vâki‘ müdde‘î-i mezbûr Karabit târih-i mezbûrda bizim huzûrumuzda zikr olunan üç kıt‘a tarlanın hakk-ı tasarruflarını ma‘rifet-i sâhib-i arz ile bi safkatin iki yüz altmış kıt‘a riyâlî guruş mukābelesinde mezbûrûn Arakil ve Danik ve Toros ve Manuk ve müvekkilleri merkūmûna ferâğ ve tefvîz edip anlar dahi tefevvuz ve kabûl eylediklerinden sonra bedel-i mezbûr iki yüz altmış kıt‘a riyâlî guruşu mezbûrlara yedlerinde olan hüccet-i şer‘iyye mûcebince zimmetimde lâzımü’l-edâ deynim olan iki yüz altmış kıt‘a mezbûrü’n-na‘t guruşa takās edip anlar dahi mukāssa ve kabûl eylediler [17b] ol tarlalar mezbûrların dâhil-i tasarrufları olup min ba‘d benim alâkam yokdur deyû ikrâr ve i‘tirâf edip bizi işhâd eyledi bu husûsa şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde ba‘de ri‘âyeti şerâiti’l-kabûl şehâdetleri makbûle olmağın mûcebiyle müdde‘î-i mezbûr Karabit bî-vech ta‘arruzdan men‘ birle mâ vaka‘a bi’t-taleb ketb olundu. Fi’l-yevmi’s-sâlis aşer min Cumâdelûlâ li sene 1077. Şuhûdü’l-hâl: Mehmed Çelebi b. Abdurrahman, İbrahim Çelebi b. Mehmed, Mehmed Beşe b. Ali, Yusuf Çelebi b. Abdullah, Hasan Çelebi b. Abdullah.