Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 102 Hüküm no: 63 Orijinal metin no: [10a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Todori v. İstemad ile oğlu Yamandi’nin varislerinin miras hususunda sulh olması Havâss-ı Aliyye kazâsı tevâbi‘inden Avasya nâm karye sâkinlerinden iken bundan akdem hâlik olan Todori v. İstemad nâm zimmînin verâseti, sulbî sagīr oğlu Yamandi’ye ve sagīre sulbiye kızı Avine nâm nasrâniyeye münhasıra olup kezâlik kable’l-kısmet mezbûr Yamandi dahi hâlik olup verâseti mezbûre Avine’ye ve hâlik-i mezbûr Todori’nin li ebeveyn karındaşları Dimo’ya ve Hriskali’ye ve li ebeveyn kız karındaşları Vargo ve Perpiye’ye münhasıra oldukdan sonra vârisûn-ı mezbûrûn Dimo ve Hriskali ve Vargo ve Perpiye meclis-i şer‘-i hatîr-i lâzımü’t-tevkīrde sagīre-i merkūme Avine’nin kıbel-i şer‘den mansûb vasîsi ve velîsi olan işbu râfi‘ü hâze’l-kitâb Yorgi v. Kozima nâm zimmî muvâcehesinde bi’t-tav‘ ve’r-rızâ ikrâr ve takrîr-i kelâm edip mezbûr Yorgi sagīr-i mezkûr Yamandi’nin ve sagīre-i merkūme Avine’nin vasîsi olduğu hasebden hâlik-i mezbûr Yamandi’nin muhallefâtına vâzı‘u’l-yed olmağın hâlâ biz dahi hâlik-i mezbûr Yamandi’den her birimize alâ mâ farazallâhü te‘âlâ isâbet eden hisse-i mütekarriremizi mezbûr Yorgi’den vesâyeti ve vekâleti hasebiyle da‘vâ ve taleb etmekle beynimizde münâza‘ât-ı kesîre ve muhâsamât-ı ekîde vâkı‘a olmuşiken el-hâletü hâzihî beynimize muslihûn tavassut edip es-sulhu seyyidü’l-ahkâm fehvâsınca bizi yedi bin nakd-i fıddî-i Osmânî [10b] râyic fi’l-vakt akçe üzre akd-i sulh inşâ ettiklerinde biz dahi sulh-i mezbûru kabûl ve bedel-i sulh olan meblağ-ı mersûm yedi bin nakd-i mezbûrü’n-na‘t akçeyi ale’l-iştirâki’s-seviy mezbûr Yorgi yedinden vesâyet-i mahkiyesi [hasebiyle] bi’t-tamâm ve’l-kemâl ahz ve kabz [ve] mezbûr Yorgi’nin zimmetini ibrâ-i âmla ibrâ ve iskāt-ı tâmla iskāt eyledik ba‘de’l-yevm husûs-ı mezbûra müte‘allik bizden bi’z-zât veya bi’l-vâsıta da‘vâ ve nizâ‘ sudûr ederse lede’l-hükkâmi’l-kirâm makbûle ve mesmû‘a olmaya dediklerinde vârisûn-ı mezbûrunun minvâl-i muharrer üzre cârî olan ikrâr ve takrîrlerini vasiyy-i mezbûr Yorgi bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Hurrire fî gurreti Rebî‘ilevvel li sene tis‘a ve ışrîn ve elf. Şuhûdü’l-hâl: es-Sâbıkūn.