Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 103 Hüküm no: 64 Orijinal metin no: [10b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sütçü Kiryaki’ye ait olduğu ispat olunan koyunların kendisine iadesi Havâss-ı Aliyye kazâsı tevâbi‘inden Küçükköy demekle ma‘rûf karyeden olup sütçü tâifesinden Kiryaki v. ( ) nâm zimmî meclis-i şer‘-i hatîr-i lâzımü’t-tevkīrde işbu râfi‘ü’l-kitâb İskender Beşe b. Abdullah nâm kasab üzerine takrîr-i da‘vâ edip bundan akdem gāib ani’l-meclis olup çoban tâifesinden olan Ergiri v. ( ) nâm zimmîye ra‘y etmek için yüz re’s koyun vermişidim el-hâletü hâzihî mezbûr Ergiri’nin Kağıdhâne kurbunda Ayazma demekle ma‘rûf mevzi‘de zikr olunan koyunları ra‘y ederken hayât ve memâtı nâ-ma‘lûm olmağın hâlâ sâlifü’l-beyân ma‘lûmü’l-aded ağnâmdan seksen dört re’si bi aynihâ mezbûr İskender Beşe nâm kasab yedinde buldum, suâl olunup lâzımı icrâ olunmak matlûbumdur dedikde mezbûr İskender Beşe sevk-i kelâm edip zikr olunan ma‘lûmü’l-aded ağnâmları işbu gāibân ani’l-meclis olan Mihal v. Yorgi ve Dimo v. Nikola nâm zimmîlerden ale’l-iştirâki’s-seviy kendilerin mülk-i mahzları olmak üzre beher re’si altmış üçer akçeye iştirâ eyledim mezbûr Ergiri’nin olduğu ma‘lûmum değildir dedikde müdde‘î-i mezbûrdan sıdk-ı kelâmını mübeyyine beyyine taleb olundukda udûl-i müslimînden Kurd Beşe b. Abdullah ve İbrahim b. Ahmed nâm kimesneler li ecli’ş-şehâde meclis-i şer‘a hâzırân olup fi’l-vâki‘ merkūm Kiryaki Çavuşköyü demekle ma‘rûf karye kurbunda bundan akdem gāib ani’l-meclis olan Ergiri nâm çobana ra‘y etmek için yüz yirmi re’s koyun vermişidi bu zikr olunan seksen dört re’s ağnâm dahi bi aynihâ ol koyunlardandır. Bu husûsa minvâl-i muharrer üzre şâhidleriz şehâdet dahi ederiz deyû edâ-i şehâdet-i şer‘iyye ettiklerinde ba‘de ri‘âyeti şerâiti’l-kabûl mezbûrânın şehâdetleri hayyiz-i kabûlde ve mahall-i irtizâda vâkı‘a oldukdan sonra mezbûr Kiryaki sâlifü’l-beyân ma‘lûmü’l-aded ağnâmları mezbûr Ergiri’ye ve gayrıya bey‘ ve yâhud hibe etmediğine ve vücûh-ı şer‘iyyeden bir vechile mülkünden ihrâc eylemediğine istihlâf olundukda ol dahi alâ vefki’l-mes’ûl yemîn billâhi’llezî enzele’l-İncîl alâ İsa -aleyhi’s-selâm- etmeğin sâlifü’l-beyân ma‘lûmü’l-aded ağnâmdan seksen dört re’s mevcûd ağnâm mezbûr Kiryaki’ye teslîme tenbîh olunup işbu hurûf ber sebîli’t-temessük ketb ve imlâ olundu. Hurrire fi’l-yevmi’l-âşir min Saferi’l-hayr li sene tis‘a ve ışrîn ve elf. Şuhûdü’l-hâl: El-Hâc Mustafa b. Mehmed el-Hammâmî, Süleyman b. Turgud, Mehmed b. Abdullah, el-Hâc Kurd b. Hüseyin, Sinan Beşe b. Abdullah er-Râcil, Ali b. Abdullah, Mustafa b. Mehmed, Yakub b. Kurd, Mustafa b. Ahmed, Perviz b. Abdullah ve gayruhüm mine’l-hâzırîn.