Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 104 Hüküm no: 65 Orijinal metin no: [10b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kosta v. Kini’ye ait olduğu ispat olunan koyunların kendisine iadesi Havâss-ı Sultâniyye kazâsı tevâbi‘inden Çavuşköyü demekle [ma‘rûf] karyeden olup sütçü tâifesinden Kosta v. Kini nâm zimmî meclis-i şer‘-i hatîr-i lâzımü’t-tevkīrde işbu râfi‘ü hâze’l-kitâb Dimo v. Ligori nâm kasab üzerine takrîr-i da‘vâ edip bundan akdem çoban tâifesinden olup gāib ani’l-meclis olan Ergiri v. ( ) nâm zimmîye ra‘y etmek için yüz re’s koyun vermişidim el-hâletü hâzihî mezbûr Ergiri, Kağıdhâne kurbunda Ayazma demekle ma‘rûf mevzi‘de zikr olunan koyunları ra‘y ederken hayât ve memâtı nâ-ma‘lûm olmağın hâlâ sâlifü’l-beyân ma‘lûmü’l-aded ağnâmdan yetmiş iki re’sini bi aynihâ mezbûr Dimo Kasab yedinde buldum, suâl olunup lâzımı icrâ olunmak matlûbumdur dedikde merkūm Dimo feth-i makāl edip zikr olunan ma‘lûmü’l-aded koyunları işbu gāibân ani’l-meclis olan Mihal v. Yorgi ve Dimo v. Nikola nâm zimmîlerden ale’l-iştirâki’s-seviy kendilerin mülk-i mahzları olmak üzre aslında yüz elli dokuz koyun olup yüz re’sini altmış ve elli dokuz re’sini otuzar akçeye iştirâ eyledim mezbûr Ergiri’nin olduğu ma‘lûmum değildir dedikde müdde‘î-i mezbûrdan sıdk-ı kelâmını mübeyyine beyyine taleb olundukda udûl-i müslimînden Kurd Beşe b. Abdullah ve İbrahim b. Ahmed nâm kimesneler li ecli’ş-şehâde meclis-i şer‘a hâzırân olup fi’l-vâki‘ mezbûr Kosta karye-i merkūme kurbunda bundan akdem gāib ani’l-meclis olan Ergiri nâm çobana ra‘y etmek için vermişidi bu zikr olunan yetmiş iki re’s ağnâm dahi bi aynihâ ol koyunlardandır bu husûsa minvâl-i muharrer üzre şâhidleriz şehâdet dahi ederiz deyû edâ-i şehâdet-i şer‘iyye ettiklerinde ba‘de ri‘âyeti şerâiti’l-kabûl mezbûrânın şehâdetleri hayyiz-i kabûl ve mahall-i irtizâda vâkı‘a oldukdan sonra mezbûr Kosta sâlifü’l-beyân ma‘lûmü’l-aded ağnâmları mezbûr Ergiri’ye ve gayra bey‘ ve yâhud hibe etmediğine ve vücûh-ı şer‘iyyeden bir vechile mülkünden ihrâc eylemediğine istihlâf olundukda ol dahi alâ vefki’l-mes’ûl yemîn billâhi’llezî enzele’l-İncîle alâ İsa -aleyhi’s-selâm- ettikden sonra sâlifü’l-aded ağnâmdan yetmiş iki re’s mevcûd koyunu merkūm Kosta’ya teslîme tenbîh olunup işbu hurûf ber sebîli’t-temessük ketb olundu. Fi’t-târihi’l-mezbûr. Şuhûdü’l-hâl: es-Sâbıkūn.