Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 113 Hüküm no: 78 Orijinal metin no: [12b-2, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sefer Beşe b. Ali’nin evini Seyyid Abdülkâdir Efendi Vakfı’na istiğlâl yoluyla sattığı Medîne-i Ebâ Eyyûb el-Ensârî -radiye anhu Rabbühü’l-Bârî- mahallâtından Takyecibaşı mahallesinde sâkin olan Sefer Beşe b. Ali nâm kimesne meclis-i şer‘-i şerîfde -el-masûn ani’t-tağyîr ve’t-tahrîf- hâzır olup âtiyyü’z-zikr menzilini hâmil-i hâze’l-kitâb merhûm Seyyid Abdülkādir Efendi vakfı’na mütevellî olan Hasan Efendi İbrahim’e bey‘ ettiğini ikrâr ve i‘tirâf etti. O da vakf-ı mezbûr malıyla ve istiğlâl için mezbûr Sefer Beşe’nin, işbu akdin kendilerinden sudûruna kadar sâhibi ve mâliki olduğu elinde ve taht-ı tasarrufunda bulundurduğu mahalle-i mezbûrede vâki‘ bir tarafdan Keyvan b. Abdullah mülkü, diğer tarafdan Mehmed Çelebi b. Mahmud mülkü, diğer tarafdan Alime Hâtun bt. ( ) mülkü ve diğer tarafdan da tarîk-i âm ile mahdûd olan menzilini cümle tevâbi‘ ve levâhıkı ve kâffe-i menâfi‘ ve merâfıkı ile râyicü’l-vakt yedi bin akçe-i Osmânî semen-i mu‘ayyen-i makbûzla andan iştirâ etti. Bâyi‘-i mezbûrun menzil-i merkūmu kirâlamak istemesi üzerine müşterî-yi mezbûr ba‘de’t-tahliyye ve’t-tekābuz, zeyilde mezkûr senenin gurre-i Muharrem-i harâmından bir sene tamâmına sekiz yüz yetmiş beş akçe ücret-i kirâ mukābilinde menzil-i merkūmu icâreye verdi. Mütevellî-i mezbûr vâki‘ ikrârı vicâhen ve şifâhen tasdîk etti. Sonra, mahalle-i mezbûre sükkânından râcil Mehmed Beşe b. Mahmud menzil-i mezbûrun derkine ve asl-ı meblağ-ı mezbûra ve ücret-i merkūmeye îcâb ve kabûlü hâvî kefâletle kefîl oldu. Cerâ zâlike ve hurrire fi’l-yevmi’l-hâdî aşer min Rebî‘ilevvel sene tis‘a ve ışrîn elf. Şuhûdü’l-hâl: Hüsam Halîfe b. Abdurrahman el-Müezzin, Abdülaziz b. Hüsam, Mahmud b. İlyas en-Nâzır, Mehmed b. Hasan, Mustafa b. Mehmed, Süleyman b. Turgud ve gayruhüm