Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 113 Hüküm no: 79 Orijinal metin no: [12b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İsa Beşe b. Abdullah’ın kendisini yaralayan Mehmed Beşe b. Kasım ile sulh olması Zümre-i yeniçeriyândan İsa Beşe b. Abdullah nâm râcil tarafından husûs-ı âti’l-beyânı ikrâra vekîl olup vekâleti hasm-ı şer‘î-i câhid mahzarında el-Hâc Mustafa b. Mehmed el-Hammâmî ve Abdi Bey b. Hüseyin nâm cündî şehâdetleri ile şer‘an sâbite ve mütehakkika olan Mehmed Beşe b. Mustafa nâm râcil meclis-i şer‘-i hatîr-i lâzımü’t-tevkīrde işbu hâmil-i hâze’l-kitâb Mehmed Beşe b. Kasım nâm râcil tarafından husûs-ı âti’l-beyânı tasdîka vekîl olup vekâleti kezâlik [13a] yine şâhidân-ı mezbûrân şehâdetleri ile şer‘an sâbite olan İbrahim Çelebi b. Mustafa nâm kimesne mahzarında bi’l-vekâle ikrâr ve takrîr-i kelâm edip bundan akdem müvekkilim mezbûr İsa Beşe’yi Defterdâr İskelesi demekle ma‘rûf mevzi‘de müvekkil-i mezbûr Mehmed Beşe bi gayrı vech-i şer‘î sağ kolundan urup mecrûh eyledi deyû da‘vâ ve taleb edip ol dahi inkâr etmekle beynlerinde münâza‘ât-ı kesîre ve muhâsamât-ı ekîde vâkı‘a olmuşidi el-hâletü hâzihî beynlerine müslimûn-ı muslihûn tavassut edip es-sulhu seyyidü’l-ahkâm fehvâsınca müvekkilim mezbûr İsa Beşe’yi bin dokuz yüz nakd-i râyic fi’l-vakt akçe üzre akd-i sulh inşâ ettiklerinde müvekkilim merkūm dahi sulh-i mezbûru kabûl ve bedel-i sulh olan meblağ-ı mersûm bin dokuz yüz akçeyi bi’t-tamâm ve’l-kemâl ahz ve kabz edip husûs-ı mezbûra müte‘allik cemî‘ da‘vâdan müvekkil-i mezbûr Mehmed Beşe’nin zimmetini ibrâ-i âmla ibrâ ve iskāt-ı tâmla iskāt eyledi ba‘de’l-yevm husûs-ı mezbûra müte‘allik müvekkilim mezbûr İsa Beşe’den bi’z-zât ve bi’l-vâsıta da‘vâ ve nizâ‘ sudûr ederse lede’l-hükkâmi’l-kirâm makbûle ve mesmû‘a olmaya dedikde vekîl-i mezbûrun minvâl-i muharrer üzre cârî olan ikrâr ve takrîrin merkūm İbrahim Çelebi bi’l-vekâle tasdîk edicek mâ hüve’l-vâki‘ bi’t-taleb ketb olundu. Hurrire fi’l-yevmi’t-tâsi‘ min Rebî‘ilevvel li târihi’l-mezbûr. Şuhûdü’l-hâl: Mustafa b. Mehmed el-Hammâmî, Mehmed Çelebi b. İbrahim er-Râcil, Mahmud Beşe b. İskender er-Râcil, Osman Çelebi b. Ahmed er-Râcil, İbrahim b. Mustafa, Osman Ağdacı, Süleyman b. Turgud, Sefer b. Kurd, Mustafa b. Mehmed ve gayruhüm mine’l-hâzırîn.