Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 114 Hüküm no: 80 Orijinal metin no: [13a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Koçi v. Yani’nin menzilini satması Vilâyet-i Rumeli’nde Avlonya kazâsına tâbi‘ Harek nâm karye sâkinlerinden Koçi v. Yani nâm zimmî meclis-i şer‘-i hatîr-i lâzımü’t-tevkīrde işbu hâmil-i hâze’l-kitâb Ahmed b. Abdullah ve Hasan b. Abdullah nâm kimesneler ve Yani v. Yorgi ve Nika v. İstaso ve Yani v. İstaso ve Kika v. Andriye ve Kiro v. Apostol nâm zimmîler muvâcehelerinde bi’t-tav‘ ve’r-rızâ ikrâr ve takrîr-i kelâm edip karye-i mezbûrede vâki‘ bir tarafı İstati v. Variye ve etrâf-ı selâsesi tarîk-i âma müntehî bir fevkānî ve bir tahtânî beyti ve zât-ı eşcâr-ı müsmireyi hâvî cüneyneyi müştemil mülk menzilimi cümle-i tevâbi‘ ve levâhıkı ve kâffe-i menâfi‘ ve merâfıkı ile mezbûrûna üç bin dört yüz fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ ve kabz-ı semen-i ma‘dûd edip mebî‘-i mezbûru mahallinde kabza müşterûn-ı mezbûrûnu taslît eyledim ba‘de’l-yevm sâlifü’l-beyân menzil-i mahdûd mezbûrûnun ale’l-iştirâki’s-seviy mülk-i müşterâ-yı sarîhidir keyfe mâ yeşâûn mutasarrıf olsunlar dedikde mukırr-ı mezbûrun vech-i mübeyyen üzre cârî olan ikrâr ve takrîrin el-mukarru lehü’l-mezbûrûn bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Hurrire fi’l-yevmi’s-sâdis min Rebî‘ilevvel li târihi’l-mezbûr. Şuhûdü’l-hâl: Nazar Çavuş b. Mehmed, Ali b. Abdullah, Niko v. Papa, Kipriyani v. Velyo, Pavli v. Dimo, Yani v. Piyo, Dimo v. Nika, Dimo v. Duka, Zafiri v. Yani ve gayruhüm.