Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 169 Hüküm no: 129 Orijinal metin no: [17b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âişe bt. Rıdvan’ın evini borcundan dolayı kocası Solak Hasan Çelebi’ye rehin vermesi Rehn-i menzil Mahmiye-i İstanbul[’da] Arabacı Bayezid mahallesi sâkinelerinden Âişe bt. Rıdvan nâm hâtun meclis-i şer‘-i şerîf-i Ahmedî ve mahfil-i dîn-i münîf-i Muhammedî’de zevci bâ‘isü’l-kitâb Solak Hasan Çelebi b. Ali nâm kimesne mahzarında ikrâr ve takrîr-i kelâm edip yedimde mülk ve hakkım olup mahalle-i mezbûrede vâki‘ bir tarafdan tarîk-i âm ve bir tarafdan Mahmud Bey mülkü ve bir tarafdan Medîne-i Münevvere vakfı ve bir tarafdan zevcim mezbûr Hasan Çelebi mülkü ile mahdûd fevkānî ve tahtânî büyût-ı adîdeyi müştemil menzilimi zevcim mezbûr Hasan Çelebi’ye zimmetimde deyn-i şer‘iyyeden hakkı olan üç yüz yirmi kıt‘a esedî guruş mukābelesinde rehn ve teslîm edip ol dahi vech-i muharrer üzre irtihân ve tesellüm eyledi dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’r-râbi‘ aşer min Cumâdelûlâ li sene seb‘a ve seb‘în ve elf. Şuhûdü’l-hâl: Fahrü’l-eşbâh Selim Ağa b. Abdülmümin, fahrü’l-akrân Mehmed Çelebi b. Abdullah, Şükrullah Bey b. Hüseyin, Abdi Çelebi b. Mustafa, İbrahim Çelebi b. Ahmed.