Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 170 Hüküm no: 130 Orijinal metin no: [17b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âişe bt. Rıdvan’ın evini kocası Solak Hasan Çelebi’ye sattığı ve bedelini borcuna takas ettiği Takās Mahmiye-i İstanbul’da Arabacı Bayezid mahallesinde sâkine Âişe bt. Rıdvan nâm hâtun meclis-i şer‘-i şerîf-i Ahmedî ve mahfil-i dîn-i münîf-i Muhammedî’de zevci bâ‘isü’l-kitâb Solak Hasan Çelebi b. Ali nâm kimesne mahzarında ikrâr ve takrîr-i kelâm edip akd-i âtînin sudûruna değin yedimde mülküm ve hakkım olup mahalle-i mezbûrede vâki‘ bir tarafdan tarîk-i âm ve bir tarafdan ba‘zen tarîk-i hâs ve ba‘zen âhar mülküm ve bir tarafdan Medîne-i Münevvere vakfı ve bir tarafdan ba‘zen kuyumcu Ali Beşe tasarrufunda olan vakf menzil ve ba‘zen Mahmud Bey mülkü ile mahdûd tûlen yirmi beş ve arzen sekiz zirâ‘ arsa üzerinde mebnî biri ocaklı ve biri ocaksız iki bâb fevkānî oda ve iki sofa ve tahtânî bir matbah ve bir kiler ve bir kenîfi müştemil hâriciyye ta‘bîr olunur menzilimi zevcim mezbûr Hasan Çelebi’ye tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile dört yüz esedî guruşa bey‘ ve teslîm edip ol dahi iştirâ ve tesellüm ettiğinden sonra semen-i mezbûru zevcim mezbûr Hasan Çelebi’nin cihet-i deyn-i şer‘îden zimmetimde hakkı olan dört yüz esedî guruşa takās edip ol dahi mukāssa eyledi min ba‘d menzil-i mahdûd-ı mezbûr merkūm Hasan Çelebi’nin mülk-i müşterâsıdır keyfe mâ yeşâ’ ve yahtâr mutasarrıf olsun dedikde gıbbe’t-tasdîk mâ hüve’l-vâki‘ bi’t-taleb ketb olundu. Fi’l-yevmi’s-sâlis aşer min Cumâdelûlâ li sene seb‘a ve seb‘în ve elf. Şuhûdü’l-hâl: Es-Sâbikūn.