Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 170 Hüküm no: 131 Orijinal metin no: [17b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Kiragos v. Avanos’un Serkis v. Abraham’daki alacağını vârislerinden tahsil ettiği İbrâ Fi’l-asl mahmiye-i İstanbul’da Çakır Ağa mahallesi sükkânından olup medîne-i Belgrad’da ticâret üzre iken müsâfiren hâlik olan Kiragos v. Avanos nâm Ermeni’nin verâseti anası Ziyade bt. İstefan nâm nasrâniye ile li ebeveyn kız karındaşı Lustin bt. Asvador nâm nasrâniyeye münhasıra olduğu şer‘an zâhir ve mütehakkik oldukdan sonra merkūmetân Ziyade ve Lustin meclis-i şer‘-i hatîr-i lâzımü’t-tevkīrde işbu râfi‘ü’s-sifr Serkis v. Abraham nâm Ermeni muvâcehesinde her biri ikrâr ve takrîr-i kelâm edip mûrisimiz hâlik-i merkūm Kiragos’un merkūm Serkis zimmetinde cihet-i deyn-i şer‘îden yüz yirmi esedî guruş hakkı olup meblağ-ı mezbûr yüz yirmi guruşdan mukaddemâ hâl-i hayâtında sekiz esedî guruşunu merkūm Serkis yedinden ahz u kabz edip meblağ-ı bâkī zimmetinde kırk esedî guruş hakkı kalıp kable’l-ahz ve’l-istîfâ hâlik olmağla meblağ-ı mezbûr bi hasebi’l-irsi’ş-şer‘î ikimize intikāl etmeğin hâlâ meblağ-ı mezkûr kırk esedî guruşu merkūm Serkis yedinden meclis-i şer‘de tamâmen ahz u kabz ettiğimizden sonra mûrisimiz hâlik-i merkūm Kiragos’un terekesinden merkūm Serkis zimmetinde bir akçe ve bir habbe hakkımız ve alacağımız kalmadı dediklerinde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâmis aşer min Cumâdelûlâ li sene seb‘a ve seb‘în ve elf. Şuhûdü’l-hâl: Şükrullah Bey b. Mustafa, Mehmed b. Ramazan, Hüseyin b. Receb, Resul b. Rıdvan.