Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 126 Hüküm no: 97 Orijinal metin no: [15b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kiremitçi Süleyman Vakfı’nın eski mütevellisi Mehmed Bey’in zimmetinde kalan alacağının tahsil olunması Medîne-i Ebâ Eyyûb el-Ensârî -râdiye anhu Rabbühü’l-Bârî-’de vâki‘ merhûm Kiremidçi Süleyman evkāfı’na hâlâ mütevellî olan fahrü’l-akrân Mustafa Çelebi b. Cafer nâm kimesne meclis-i şer‘-i hatîr-i lâzımü’t-tevkīrde sâbıkan vakf-ı mezbûra mütevellî olan Mehmed [Bey] müteveffânın sulbî kebîr oğlu Hasan Bey nâm cündî mahzarında takrîr-i kelâm edip bundan akdem mezbûr Hasan Bey’in babası merkūm Mehmed’in üzerinde tevliyyet-i merkūme bana tevcîh olundukda mezbûr Mehmed’in yedinde olan mâl-ı vakf-ı mezbûrun ([Derkenar:] Hatâ olunmağın sonradan tashîh olundu) aslından cümle makbûzu olan meblağ hesâb ve kitâb olundukda yetmiş beş bin akçe olup meblağ-ı mezbûrun altmış dokuz bin beş yüz akçesini müteveffâ-yı mezbûrun hâl-i sıhhatinde yedinden ahz ve kabz edip bâkī kalan beş bin beş yüz akçesini mezbûr Mehmed kendi masrafına harc ve sarf etmekle zimmetinde bâkī kalmışdı el-hâletü hâzihî meblağ-ı bâkī beş bin beş yüz akçeyi müteveffâ-yı mezbûrun oğlu merkūm Hasan Bey babasının muhallefâtını sûk-ı sultânîde bey‘ ettikden sonra semeninden meblağ-ı bâkī beş bin beş yüz akçeyi tevliyyetim hasebiyle merkūm Hasan Bey yedinden ahz ve kabz eyledim ba‘de’l-yevm husûs-ı mezbûra müte‘allik mezbûr Hasan Bey ile da‘vâ ve nizâ‘ım yokdur dedikde mukırr-ı mezbûru ikrâr-ı meşrûhunda merkūm Hasan Bey vicâhen tasdîk edicek mâ hüve’l-vâki‘ bi’t-taleb ketb olundu. Hurrire fi’l-yevmi’s-sânî aşer min Rebî‘ilevvel li sene tis‘a ve ışrîn ve elf. Şuhûdü’l-hâl: Keyvan Ağa b. Abdullah, Ali Ağa b. Abdülmennân el-Mütevellî bi vakf-ı Cafer Paşa, Bayram Efendi b. Şükrullah el-Hatîb, el-Hâc Turgud, Hızır b. Abdullah, Abdurrahman Halîfe el-İmâm, es-Seyyid Mehmed Şabanzâde, Muslihiddin Efendi b. Mustafa ve gayruhüm.