Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 126 Hüküm no: 98 Orijinal metin no: [16a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Bazı zimmî meyhanecilerin alacaklarını kefîli Nikola v. Dimo’dan tahsil ettikleri Meyhâneci tâifesinden İstenop v. Yorgi ve Yorgi v. Dimo ve Dimo v. Nikola ve Yorgi v. Laskari nâm zimmîler meclis-i şer‘-i hatîr-i lâzımü’t-tevkīrde işbu hâmil-i hâze’l-kitâb Nikola v. Dimo nâm zimmî muvâcehesinde her biri ikrâr ve takrîr-i kelâm edip bundan akdem gāib ani’l-meclis olan Dimo v. Yorgi nâm zimmî bi tarîki’l-karzi’ş-şer‘î on beş bin beş yüz nakd-i fıddî-i Osmânî râyic fi’l-vakt akçe verip meblağ-ı mezbûru merkūm Dimo bize edâ ve îfâ etmeğe kādir olmayıp gaybet ederse edâsına mezbûr Nikola emr ve kabûlü hâviye kefâlet ile kefîl olmağla biz dahi meblağ-ı mezbûr on beş bin beş yüz nakd-i mezbûrü’n-na‘t akçe mezbûr Dimo gāib olmağın kefâleti hasebiyle mezbûr Nikola’dan da‘vâ ve taleb etmekle beynimizde münâza‘ât-ı kesîre ve muhâsamât-ı ekîde vâkı‘a olmuşidi el-hâletü hâzihî beynimize muslihûn tavassut edip semen-i ikrâr on [beş] bin beş yüz nakd-i mezbûrü’n-na‘t akçe üzerine akd-i sulh inşâ ettiklerinde biz dahi sulh-i mezbûru kabûl ve bedel-i sulh olan meblağ-ı mezbûr on bin beş yüz akçeyi kefîl-i mezbûr Nikola yedinden bi’t-tamâm ve’l-kemâl ahz ve kabz edip husûs-ı mezbûra müte‘allik kefîl-i mezbûr Nikola’nın zimmetini ibrâ-i âmla ibrâ ve iskāt-ı tâmla iskāt eyledik ba‘de’l-yevm husûs-ı mezbûra bizden bi’z-zât veya bi’l-vâsıta da‘vâ ve nizâ‘ sudûr ederse lede’l-hükkâmi’l-kirâm makbûle ve mesmû‘a olmaya dedikde mukırrûn-ı mezbûrûnun vech-i mübeyyen üzre cârî olan ikrâr ve takrîrin kefîl-i mezbûr Nikola bi’l-muvâcehe tasdîk edicek mâ hüve’l-vâki‘ bi’t-taleb ketb olundu. Hurrire fi’t-târihi’l-mezbûr. Şuhûdü’l-hâl: Mustafa b. Mehmed, Mehmed b. Hanefi, Ali b. Abdullah, Süleyman b. Turgud, Yakub b. Kurd, İstemad [v.] Manol, Sosani [v.] Papa Nikola, Yanik v. Nikola, Dimo v. Andriye, Kosta v. İstemad, Todori v. Yorgi.