Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 127 Hüküm no: 99 Orijinal metin no: [16a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Metro v. Niko’nun babasının İbrahim’in oğullarına olan borcunu ödemesi Vilâyet-i Rumeli’nde Avlonya sancağında Arnavud Belgradı kazâsına tâbi‘ Jitomi demekle ma‘rûf karyeden Metro v. Niko nâm zimmî meclis-i şer‘-i hatîr-i lâzımü’t-tevkīrde işbu hâmil-i hâze’l-kitâb Ahmed ve Hasan ve Sinan Beşe ebnâ-i İbrahim nâm kimesneler mahzarlarında ikrâr ve takrîr-i kelâm edip bundan akdem karye-i mezbûrede mürd olan babam Niko’nun merkūmûna iki bin dört yüz akçe deyni olmağın karye-i mezbûrede vâki‘ Estiye mahallesi kurbunda vâki‘ bir tarafdan Hızır b. Mehmed bağına ve bir tarafdan Hristo v. Kini bağına ve bir tarafdan Mihal v. Vasil bağına ve bir tarafdan vâdiye müntehî tahmînen on çapalık bir kıt‘a mülk bağımı mezbûruna bin dokuz yüz akçeye bey‘ edip ve mebî‘-i mezkûru mahallinde kabza müşteriyyûn-ı mezbûrûnu taslît eylediğimden sonra yine karye-i merkūme sınırı dâhilinde lede’l-ahâlî ma‘lûmü’l-hudûd tahmînen beş dönüm bir kıt‘a taht-ı tasarrufumda olan tarlanın hakk-ı tasarrufunu merkūmûna tefvîz eyledim mezbûrûn dahi minvâl-i muharrer üzre tefevvüz ve kabûl eylediklerinden sonra mukābele-i tefvîzde olan beş yüz akçe ve sâlifü’l-beyân bağdan olan bin dokuz yüz akçe deyn-i mezbûr mukābelesinde benimle ba‘de’l-isbât mezbûrûn takās eyledim ba‘de’l-yevm mebî‘-i mahdûd mezbûrûnun mülk-i müşterâ-yı sarîhleridir ve mârrü’z-zikr bir kıt‘a tarlanın dahi hakk-ı tasarrufu merkūmûnundur sâir emsâli tasarrufları gibi keyfe mâ yeşâûn ve hasbe mâ yürîdûn mutasarrıf olsunlar dedikde mukırr-ı mezbûrun vech-i mübeyyen üzre cârî olan ikrâr ve takrîrin el-mukarru lehümü’l-mezbûrûn Ahmed ve Sinan ve Hasan bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Hurrire fi’l-yevmi’r-râbi‘ aşer min Rebî‘ilevvel li sene tis‘a ve ışrîn ba‘de’l-elf. Şuhûdü’l-hâl: Ramazan b. Hasan, Hüseyin b. Kasım, Minho v. Kini, Minho v. Koro, İstaso v. Panan, Andriye v. Petko, Yani v. Nidro, Martino v. Niko, İstako v. Peto, Mitro v. Niko ve gayruhüm.