Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 128 Hüküm no: 100 Orijinal metin no: [16a-3, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sâliha bt. Mustafa’nın evini Mehmed el-Ensârî Vakfı’na sattığı Medîne-i Ebâ Eyyûb el-Ensârî -radiye anhu Rabbühü’l-Bârî- mahallâtından Takyecibaşı mahallesinde sâkine olan Sâliha bt. Mustafa nâm hâtun âtiyyü’z-zikr menzilini merhûm Mehmed el-Ensârî vakfı’na mütevellî olan hâmil-i hâze’l-kitâb Mehmed Çavuş b. Mustafa’ya bey‘ ettiğini ikrâr ve i‘tirâf etti. Mütevellî-i mezbûr da vakf-ı mezbûr malıyla ve istiğlâl için mezbûre Sâliha hâtunun işbu akdin sudûruna kadar sâhibi ve mâliki olduğu elinde ve taht-ı tasarrufunda bulundurduğu mahalle-i mezbûrede kâin olup bir tarafdan Fati Hâtun bt. ( ) mülkü, diğer tarafdan kurşuncu Yusuf b. ( ) mülkü, öbür tarafdan Mustafa b. ( ) mülkü ve diğer tarafdan da Mehmed Efendi mülkü ile mahdûd olan menzilini cümle tevâbi‘ ve levâhıkı ve kâffe-i menâfi‘ ve merâfıkı ile râyicü’l-vakt yedi bin akçe-i Osmânî semen-i mu‘ayyen-i makbûz ile andan iştirâ etti. Bâyi‘a-i mezbûrenin menzil-i merkūmu kirâlamak istemesi üzerine müşterî-yi mezbûr ba‘de’t-tahliyye ve’t-tekābuz, zeyilde mezkûr senenin gurre-i Saferi’l-hayrından bir sene tamâmına yedi yüz elli akçe ücret-i kirâ mukābilinde menzil-i merkūmu icâreye verdi. Mütevellî-i mezbûr vâki‘ ikrârı vicâhen ve şifâhen tasdîk etti. Sonra mukırra-i mezbûrenin zevci Mehmed b. Abdullah nâm kimesne menzil-i mezbûrun derkine ve asl-ı meblağ-ı mezbûra ve ücret-i merkūmeye îcâb ve kabûlü hâvî kefâletle kefîl oldu. Cerâ zâlike ve hurrire fi’l-yevmi’s-sânî aşer min Rebî‘ilevvel sene tis‘a ve ışrîn ba‘de’l-elf. Şuhûdü’l-hâl: Seyyid Mehmed b. Seyyid Sefer, Süleyman Çelebi b. Sünbül el-Müezzin, Mehmed Halîfe eş-şehîr bi Zengerci?-zâde, Mehmed b. Yusuf el-Câbî, Mustafa b. Mehmed, Ali b. Abdullah, Yakub b. Kurd ve gayruhüm mine’l-hâzırîn.