Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 129 Hüküm no: 101 Orijinal metin no: [16b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasnâ Hâtun Camii’nin tamiri için cami vakfına ait bir adet harap menzilin Yusuf b. Ferhad’a satılması Havâss-ı Aliyye kazâsı müzâfâtından Terkos nâhiyesine tâbi‘ Harâccı nâm karyede vâki‘ merhûme Hasnâ Hâtun binâ eylediği câmi‘-i şerîfe yevmî bir akçe vazîfe ile mütevellî olan Halil b. Mustafa nâm kimesne meclis-i şer‘-i hatîr-i lâzımü’t-tevkīrde karye-i mezbûre sükkânından Yusuf b. Ferhad nâm kimesne mahzarında bi’t-tav‘ ve’r-rızâ ikrâr ve takrîr-i kelâm edip câmi‘-i mezbûr tûl-i zamân ile harâbe müşrif olup ta‘mîr ve termîmine kifâyet edecek mâl-ı vakıf dahi olmayıp bir müddet dahi müsâmaha olunursa bi’l-külliyye harâb olması mukarrerdir ba‘de’t-tahmîn harâbına on iki bin akçe lâzım olduğu müttefekun-aleyh olup vakf-ı mezbûrdan karye-i merkūmede vâki‘ bir tarafdan Mehmed b. ( ) bağına ve bir tarafdan hendek ve iki tarafdan tarîk-i âma mahdûd olan menzil dahi bi’l-külliyye harâb olmağın nukzu bey‘ olunup câmi‘-i merkūmun harâbına sarf olunmak evlâ ve ahrâ görüldükde kıbel-i şer‘den izin ile ba‘de’l-müzâyede merkūm Yusuf’un üzerinde üç bin akçede karâr edip ziyâdeden rağabât-ı nâs münkatı‘a olmağın ben dahi tevliyyetim hasebiyle menzil-i mezbûr nukzu merkūm Yusuf’a üç bin nakd-i fıddî-i Osmânî râyic fi’l-vakt akçeye bey‘ ol dahi iştirâ ve kabûl edip kabz-ı semen ettiğimden sonra menzil-i mezbûrun arsasının hakk-ı tasarrufunu dahi beher sene yirmi akçe mukāta‘a ile mezbûr Yusuf’a tefvîz edip ol dahi minvâl-i muharrer üzre tefevvüz ve kabûl ettikden sonra mâ hüve’l-vâki‘ bi’t-taleb ketb olundu. Hurrire fi’l-yevmi’s-sâdis aşer min Zilka‘deti’ş-şerîfe li sene semân ve ışrîn ve elf. Şuhûdü’l-hâl: İbrahim Ağa b. Abdülmennân, Mehmed Bey b. Abdullah el-Cündî Mehmed Bey b. Abdullah er-Râcil, Musa b. Abdullah, Mustafa b. Mehmed, Ali b. Abdullah, Mehmed b. Hanefi, Yakub b. Kurd ve gayruhüm.