Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 129 Hüküm no: 102 Orijinal metin no: [16b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasnâ Hâtun Camii’nin tamiri için cami vakfına ait bir adet harap menzilin Musli b. Müstecab ve Havvâbt. Abdullah’a satılması Havâss-ı Sultâniyye kazâsı müzâfâtından Terkos nâhiyesine tâbi‘ Harâccı nâm karyede vâki‘ merhûme Hasnâ Hâtun binâ eylediği câmi‘-i şerîfe câbî olan Sinan Halîfe b. Abdünnebi meclis-i şer‘-i hatîr-i lâzımü’t-tevkīrde yine karye-i merkūme sâkinlerinden işbu hâmileyi’l-kitâb Musli b. Müstecâb ve Havvâbt. Abdullah nâm kimesneler mahzarlarında bi’t-tav‘ ve’r-rızâ ikrâr ve takrîr-i kelâm edip câmi‘-i mezbûr tûl-i zamân ile harâbe müşrif olup ta‘mîr ve termîmine kifâyet edecek mâl-ı vakıf dahi olmayıp bir müddet dahi müsâmaha olunursa bi’l-külliyye harâb olması mukarrerdir ba‘de’t-tahmîni’ş-şer‘î harâbına on iki bin akçe lâzım olduğu müttefekun-aleyh olup vakf-ı mezbûrdan karye-i merkūmede vâki‘ bir tarafdan Nasuh b. İbrahim Ağa mülküne ve bir tarafdan tarîk-i hâssa ve iki tarafdan tarîk-i âma müntehî ve mahdûd olan menzil dahi bi’l-külliyye harâb olmağın nukzu bey‘ olunup semeni ile câmi‘-i mezbûrun harâbı ta‘mîr ve termîm olunmak evlâ ve ahrâ görüldükde kıbel-i şer‘den izin ile ba‘de’l-müzâyede merkūmânın üzerinde beş yüz nakd-i fıddî-i Osmânî râyic fi’l-vakt akçede karâr edip ziyâdede rağabât-ı nâs münkatı‘a olmağın ben dahi cibâyetim hasebiyle menzil-i mezbûrun nukzu mersûmâna ale’l-iştirâki’s-seviy beş yüz nakid akçeye bey‘ edip anlar dahi iştirâ ve kabûl ettikden sonra menzil-i mezbûrun arsasının tasarrufunu beher sene on akçe mukāta‘a ile mezbûrâna tefvîz edip anlar dahi minvâl-i muharrer üzre tefevvüz ve kabûl eylediler dedikde mâ hüve’l-vâki‘ bi’t-taleb ketb olundu. Hurrire fi’t-târihi’l-mezbûr. Şuhûdü’l-hâl: Es-Sâbıkūn.