Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 130 Hüküm no: 103 Orijinal metin no: [16b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasnâ Hâtun Camii’nin tamiri için cami vakfına ait bir adet harap menzilin Hemrâz bt. Abdullah’a satılması Havâss-ı Aliyye kazâsı müzâfâtından Terkos nâhiyesine tâbi‘ Harâccı nâm karyede vâki‘ merhûme Hasnâ Hâtun binâ eylediği câmi‘-i şerîfe yevmî bir akçe vazîfe ile mütevellî olan Halil b. Mustafa nâm kimesne meclis-i şer‘-i şerîfde yine karye-i merkūme sâkinlerinden Hemrâz bt. Abdullah nâm hâtun muvâcehesinde bi’t-tav‘ ve’r-rızâ ikrâr ve takrîr-i kelâm edip câmi‘-i mezbûr tûl-i zamân ile harâbe müşrif olup ta‘mîr ve termîmine kifâyet edecek mâl-ı vakıf dahi olmayıp bir müddet dahi müsâmaha olunursa bi’l-külliyye harâb olması mukarrerdir ba‘de’t-tahmîn harâbına [on iki bin] akçe lâzım olduğu müttefekun-aleyh olup vakf-ı mezbûrdan karye-i merkūmede vâki‘ iki tarafdan Mehmed (…) ve bir tarafdan Yusuf b. Ferhad mülküne ve bir tarafdan tarîk-i âma müntehî ve mahdûd olan menzil dahi kezâlik bi’l-külliyye harâb olmağın nukzu bey‘ olunup câmi‘-i mezbûrun harâbına sarf olunmak evlâ ve ahrâ görüldükde kıbel-i şer‘den izin ile ba‘de’l-müzâyede merkūme Hemrâz Hâtun üzerinde üç bin altı yüz akçede karâr edip ziyâdeden rağabât-ı nâs münkatı‘a olmağın ben dahi tevliyyetim hasebiyle menzil-i mezbûrun nukzınu merkūme Hemrâz Hâtun’a üç bin altı yüz akçeye bey‘ ol dahi iştirâ ve kabûl edip kabz ettikden sonra menzil-i mezbûrun arsasının tasarrufunu dahi beher sene yirmi akçe mukāta‘a ile mezbûre Hemrâz’a tefvîz edip ol dahi minvâl-i muharrer üzre tefevvüz ve kabûl eyledi dedikde mâ hüve’l-vâki‘ bi’t-taleb ketb olundu. Hurrire fi’t-târihi’l-mezbûr. Şuhûdü’l-hâl: es-Sâbıkūn.