Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 131 Hüküm no: 104 Orijinal metin no: [17a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Dimitri’nin oğulları İstati ve Panayoti’nin tarlalarının kullanım hakkını Hristo v. Ligori, İskarlet v. Yorgi ve Yorgi v. Rivarko’ya devretmeleri Vilâyet-i Rumeli’nde İnebahtı sancağında Yenişehir kazâsı müzâfâtından Fener nâhiyesine tâbi‘ Draha nâm karye sâkinlerinden İstati ve Panayoti veledey Dimitri nâm zimmîler meclis-i şer‘-i hatîr-i lâzımü’t-tevkīrde yine nâhiye-i merkūmeye tâbi‘ Tomyani nâm karye sâkinlerinden işbu hâmil-i hâze’l-kitâb Hristo v. Ligori ve İskarlet v. Yorgi ve Yorgi v. Rivarko nâm zimmîler mahzarlarında bi’t-tav‘ ve’r-rızâ ikrâr ve takrîr-i kelâm edip karye-i merkūme sınırı dâhilinde Kamolya demekle ma‘rûf mevzi‘de vâki‘ iki tarafdan Dimitri v. Lobarli tarlasına ve bir tarafdan Kosta v. Malkoç tarlasına ve bir tarafdan Mihal v. Zari tarlasına müntehî tahmînen diyârımız keyli ile bir keyl tohum istî‘âb eder taht-ı tasarrufumuzda olan bir kıt‘a tarlanın hakk-ı tasarrufunu sâhib-i arz ma‘rifetiyle merkūmûna tefvîz eyledik merkūmûn dahi minvâl-i muharrer üzre tefevvüz ve kabûl eylediklerinden sonra mukābele-i tefvîzde olan yedi bin beş yüz akçe merkūmûn yedinden ale’l-iştirâki’s-seviy bi’t-tamâm ve’l-kemâl ahz ve kabz eyledik ba‘de’l-yevm sâlifü’l-beyân bir kıt‘a tarlanın hakk-ı tasarruf merkūmûnundur sâir emsâli tasarrufları gibi keyfe mâ yeşâûn ve hasbe mâ yürîdûn mutasarrıf olsunlar dediklerinde mukırrân-ı mezbûrânın vech-i mübeyyen üzre cârî olan ikrâr ve takrîrin el-mukarru lehümü’l-mezbûrûn Hristo ve İskarlet ve Yorgi bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Hurrire fi’l-yevmi’s-sânî min Rebî‘ilevvel li târihi’l-mezbûr. Şuhûdü’l-hâl: Yorgi v. Androni, Angilaki v. Dimitri, Dimo v. Komyana, Yorgi v. Dimitri, Mihal v. Şeroblo, Yorgo v. Lesko, İstiranik v. Kolori, Maskalyo v. İstiranik, Yorgi v. Zervane, Apostol v. İstato, Androni v. Nikola.