Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 131 Hüküm no: 105 Orijinal metin no: [17a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hristo v. İstati’nin bazı emlâkinin kullanım hakkını Küçük Yani v. Dimitri’ye devretmesi Havâss-ı Aliyye kazâsı müzâfâtından Terkos nâhiyesine [tâbi‘] Avasya nâm karye sâkinlerinden Hristo v. İstati nâm zimmî meclis-i şer‘-i hatîr-i lâzımü’t-tevkīrde işbu hâmilü’l-kitâb Küçük Yani v. Dimitri nâm zimmî muvâcehesinde bi’t-tav‘ ve’r-rızâ ikrâr ve takrîr-i kelâm edip karye-i merkūme sınırında mevâzi‘-i adîdede vâki‘ her biri ma‘lûmetü’l-hudûd olup tahmînen cümlesi yedi müd tohum istî‘âb eder sekiz kıt‘a mutasarrıf olduğum tarlanın ve yine karye-i merkūme kurbunda vâki‘ lede’l-ahâlî ma‘lûmü’l-hudûd bir kıt‘a mutasarrıf olduğum çayırın dahi hakk-ı tasarrufunu sâhib-i [arz] ma‘rifetiyle mezbûra tefvîz edip ol dahi minvâl-i muharrer üzre tefevvüz ve kabûl ettikden sonra mukābele-i tefvîzde olan sekiz bin nakd-i fıddî-i Osmânî râyic fi’l-vakt akçeyi mezbûr Yani yedinden bi’t-tamâm ve’l-kemâl ahz ve kabz eyledim ba‘de’l-yevm sâlifü’[l-beyân] arâzi ve çayırın hakk-ı tasarrufu mersûmundur sâir emsâli tasarrufu gibi keyfe mâ yeşâ ve yahtâr mutasarrıf olsun dedikde gıbbe’t-taleb ketb olundu. Fi’t-târihi’l-mezbûr. Şuhûdü’l-hâl: Mustafa b. Mehmed, Mehmed b. Hanefi, Ali b. Abdullah, Süleyman b. Turgud, Yakub b. Kurd, Osman Çelebi b. Ahmed el-Müezzin, Hüseyin b. Hasan el-Muhtesib, Papa Aleksi, Diyani v. Manol, Yorgaki v. Dimitri ve gayruhüm mine’l-hâzırîn.