Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 132 Hüküm no: 106 Orijinal metin no: [17a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Selâmet bt. Abdullah’ın miras ve diğer alacak hususlarında Hızır b. Abdurrahman’ın zimmetini ibra etmesi Havâss-ı Sultâniyye kazâsı müzâfâtından Küçükçekmece nâhiyesine tâbi‘ Bosnaköyü demekle ma‘rûf karye sâkinelerinden Selâmet bt. Abdullah nâm hâtun meclis-i şer‘-i hatîr-i lâzımü’t-tevkīrde işbu hâmil-i hâze’l-kitâb Hızır b. Abdurrahman nâm kimesne muvâcehesinde bi’t-tav‘ ve’r-rızâ ikrâr ve takrîr-i kelâm edip mezbûr Hızır’ın babası merkūm Abdurrahman benim zevcim olup bundan akdem karye-i mezbûrede vefât edip verâseti sulbî oğlu mezbûr Hızır ile bana münhasıra olup ve zevcim mezbûr Abdurrahman zimmetinde karz-ı şer‘îden iki bin akçe ve bin akçe dahi mehr-i müeccelimden cem‘an üç bin akçe hakkım olup hâlâ üç bin akçe zevcim mezbûrun oğlu merkūm Hızır yedinden alıp kabz eylediğimden sonra zevcim mezbûrdan bana isâbet eden sümün hisse-i mevrûsum mukābelesinde yine mezbûr Hızır yedinden bir döşek ve iki minder ve bir yastık ve dört pâre bez ve üç makrama ve iki çarşaf ve dört keyl alef ve bir sahan ve iki tas ve bir yahni tepsisi ve bir tencere ve bir kilim ve bir çift incili altın küpe ve iki zümrüd taşlı gümüş yüzük alıp kabz edip husûs-ı mezbûra müte‘allik da‘vâ ve talebden mezbûr Hızır’ın zimmetini ibrâ-i âmla ibrâ ve iskāt-ı tâmla iskāt eyledim ba‘de’l-yevm husûs-ı mezbûra müte‘allik benden bi’z-zât ve bi’l-vâsıta da‘vâ ve nizâ‘ sudûr ederse lede’l-hükkâmi’l-kirâm makbûle ve mesmû‘a olmaya dedikde mukırra-i mezbûrenin vech-i muharrer üzre cârî olan ikrâr ve takrîrin el-mukarru lehü’l-mezbûr Hızır bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Hurrire fi’t-târihi’l-mezbûr. Şuhûdü’l-hâl: Halil b. Mehmed, Mahmud b. Mehmed, Ali Beşe b. Abdullah el-Cebeci, Yakub b. Kurd, Süleyman b. Turgud, Mehmed b. Hanefi, Ali b. Abdullah, Perviz b. Abdullah ve gayruhüm.