Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 136 Hüküm no: 112 Orijinal metin no: [18a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Todori v. Meşki’nin bazı zimmîlerdeki alacağını tahsil etmesi Vilâyet-i Rumeli’nde Vize sancağına tâbi‘ Boğazhisar kazâsı müzâfâtından Kurudere nâm karye sâkinlerinden Todori v. Meşki nâm zimmî meclis-i şer‘-i hatîr-i lâzımü’t-tevkīrde Havâss-ı Aliyye kazâsına tâbi‘ selhâne sâkinlerinden olup çaryekçi tâifesinden olan işbu hâmilü’l-kitâb Kini v. Dedo ve Dedo v. Kini ve Rizo v. İstadino ve Dimo v. Rizo nâm zimmîler muvâcehesinde bi’t-tav‘ ve’r-rızâ ikrâr ve i‘tirâf edip mezbûrûn zimmîlere ber vech-i iştirâk her biri yüz kırk akçe olmak üzre beş yüz yirmi aded koyun vermiş idim zikr olunan ağnâmın bahâsı yetmiş iki bin sekiz yüz akçe olup meblağ-ı merkūmu mezbûrûn yedlerinden hâlâ bi’t-tamâm ve’l-kemâl ahz ve kabz edip zimmetlerinde meblağ-ı merkūmdan bir akçe ve bir habbe hakkım kalmadı dedikde mukarru lehümü’l-mezbûrûn bi’l-muvâcehe tasdîk ve bi’l-müşâfehe tahkīk ettiklerinden sonra mâ hüve’l-vâki‘ bi’t-taleb ketb olunup yed-i tâlibine def‘ ve i‘tâ olundu ki vakt-i hâcetde müzekkir-i mâ cerâ ola. Hurrire fi’l-yevmi’l-hâdî ve’l-ışrîn min Rebî‘ilevvel li sene tis‘a ve ışrîn ve elf. Şuhûdü’l-hâl: İstemad v. Ovili, Pavdos v. Mitroyas, Yorgo v. Niko, Kono v. Vini, Dimo v. Deto, ( ) v. Kostos?.