Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 137 Hüküm no: 113 Orijinal metin no: [18b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Nikola ve kardeşi Artine’nin menzil hisselerini Angeli v. Dimo’ya satması Havâss-ı Kostantıniyye kazâsı tevâbi‘inden Nifoz nâm karye sâkinlerinden Nikola v. Kator nâm zimmî kendi tarafından asâleten ve li ebeveyn şakīkası Artine nâm nasrâniye tarafından husûs-ı âti’l-beyânı bey‘ ve kabz-ı semene vekîl olup vekâleti hasm-ı şer‘î-i câhid mahzarında Nikola v. Yorgi ve Mihal v. Dimitri nâm zimmîler şehâdetleri ile şer‘an sâbite ve mütehakkika oldukdan sonra vekâleti meclis-i şer‘-i hatîr-i lâzımü’t-tevkīrde işbu hâmil-i hâze’l-kitâb Angeli v. Dimo nâm zimmî mahzarında bi’l-asâle ve bi’l-vekâle ikrâr ve takrîr-i kelâm edip bundan akdem karye-i merkūmede vâlidemiz ( ) nâm nasrâniye hâlike oldukda verâseti bana ve mezbûre Artine’ye münhasıra olup hâlike-i mezbûrenin karye-i merkūmede vâki‘ cevânib-i erba‘ası tarîk-i âma müntehî olan menzilden bana ve merkūm Artine’ye bi hasebi’l-irsi’ş-şer‘î isâbet eden hisse-i şer‘iyye-i mevrûselerimizi merkūm Angeli’ye bin nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ edip kabz-ı semen ve teslîm-i mebî‘-i mahdûd kıldım ba‘de’l-yevm sâlifü’l-beyân menzil-i mahdûddan ikimize isâbet eden hisse-i mevrûselerimiz merkūm Angeli’nin mülk-i müşterâ-yı sarîhidir keyfe mâ yeşâ ve yahtâr mutasarrıf olsun dedikde mukırr-ı mezbûr Nikola’nın vech-i mübeyyen üzre cârî olan ikrâr ve takrîrin el-mukarru lehü’l-mezbûr Angeli bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Hurrire fi’l-yevmi’r-râbi‘ min Rebî‘ilevvel li sene tis‘a ve ışrîn ba‘de’l-elf. Şuhûdü’l-hâl: Süleyman b. Turgud, Yakub b. Kurd, İlya v. Yani, Savatyanoz v. Dimitri, Yorgi v. Nikola, Sofyanoz v. Orano, Hristo v. Sofyanoz.