Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 138 Hüküm no: 114 Orijinal metin no: [18b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mahzenci Mahmud Çelebi Vakfı’na ait odanın süknâ hakkının Süleyman b. Abdürrezzak’a verilmesi Medîne-i Ebâ Eyyûb-i Ensârî -râdiye anhu Rabbühü’l-Bârî- mahallâtından Evlice Baba mahallesinde mahzenci Mahmud Çelebi demekle şehîr kimesne bir tarafdan el-Hâc Sefer b. Abdullah mülküne ve iki tarafdan vâkıf-ı mûmâ-ileyhin vakfına ve bir tarafdan tarîk-i âma müntehî odayı vakıf ve tesbîl edip hakk-ı süknâsını evvelâ utekāsından olan Servinaz nâm mu‘takasına ve ba‘de vefâtihâ evlâdına ve ba‘de’l-inkırâz beher yevm ba‘de salâti’s-subh üç İhlâs-ı şerîf tilâvet etmek üzre sulehâya şart eylediği sâlifü’z-zikr odada sâkin Mahmud b. Ferhad nâm kimesnenin müte‘addid hâneleri olup min külli’l-vücûh süknâya adem-i ihtiyâcı mütebeyyin ve menzil-i merkūmda kendi sâkin olmayıp âharı iskân eylediği müte‘ayyin olmağın ref‘ olunup yerine işbu hâmilü’l-kitâb Süleyman b. Abdürrezzak nâm kimesne fakīrü’l-hâl ve kesîrü’l-iyâl olduğundan mâ‘adâ süknâya dahi ihtiyâc-ı kül ile muhtâc olup her vechile mahal ve müstahık olmağın ber mûceb-i şart-ı vâkıf menzil-i mezbûr merkūm Süleyman’a tavsiye olunup işbu hurûf ber sebîli’t-temessük ketb olunup yed-i tâlibe def‘ ve vaz‘ olundu gerekdir ki inde’l-ihtiyâc ihticâc edine. Hurrire fi’l-yevmi’l-hâdî ve’l-ışrîn min Rebî‘ilevvel li târihi’l-mezbûr. Şuhûdü’l-hâl: Hüsam Efendi b. Ahmed el-Müderris, Mehmed Dede b. Mahmud, Mahmud b. Mehmed, Mustafa b. Mehmed, Mehmed b. Hanefi, Süleyman b. Turgud, Mehmed Bey b. Abdullah el-Cündî Yakub b. Kurd, Ali b. Abdullah, Perviz b. Abdullah, Yusuf b. Abdullah ve gayruhüm.