Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 139 Hüküm no: 116 Orijinal metin no: [18b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ömer Ağa b. Abdülmennân’ın Râziye bt. İskender’e bazı emlâkini satıp bazısının da kullanım hakkını devretmesi Medîne-i Ebâ Eyyûb el-Ensârî -râdiye anhu Rabbühü’l-Bârî- mahallâtından Davud Ağa mahallesi sükkânından olup sâbıkan sağ ulûfeciler ağası olan fahrü’l-emâsil ve’l-a‘yân Ömer Ağa b. Abdülmennân tarafından husûs-ı âti’l-beyânı ikrâra vekîl olup vekâleti hasm-ı şer‘î-i câhid mahzarında el-Hâc Mustafa Bey b. Ahmed ve Hasan Bey b. Mustafa el-Cündî şehâdetleri ile şer‘an sâbite ve mütehakkik olan fahrü’l-eimme Maden Halîfe b. Bünyad meclis-i şer‘-i hatîr-i lâzımü’t-tevkīrde işbu hâmiletü’l-kitâb Râziye Hâtun bt. İskender tarafından husûs-ı âti’l-beyânı tasdîka vekîl olup vekâleti hasm-ı şer‘î-i câhid mahzarında kezâlik yine şâhidân-ı mezbûrân şehâdetleri ile şer‘an sâbite olan merkūme Râziye’nin sulbî kebîr oğlu fahrü’l-cünûd ve’l-cüyûş Ahmed Çavuş b. Ali nâm kimesne mahzarında bi’l-vekâle ikrâr ve takrîr-i kelâm edip Havâss-ı Sultâniyye kazâsı müzâfâtından nâhiye-i Küçükçekmece’ye tâbi‘ Arnavud nâm karyede vâki‘ çiftlik demekle mu‘abber bir tarafdan Solak Mehmed Çelebi b. ( ) mülküne ve bir tarafdan müvekkilim mûmâ-ileyh Ömer Ağa [19a] [mülküne] ve bir tarafdan tarîk-i âma müntehî bir fevkānî ve iki tahtânî beyti ve fırını ve samanlığı ve zât-ı eşcâr-ı müsmire ve gayr-ı müsmireyi hâvî cüneyneyi ve bi’r-i mâ ve kenîfi müştemil mülk menzilini ve çiftlik-i mezbûrda sâkin bir Eflakiyyü’l-asl Mustafa nâm abd-i memlûkünü ve bir Rûsiyyetü’l-asl Mülâyim bt. Abdullah nâm câriyesini ve altı kebeyi ve iki kaliçeyi ve üç yorgan ve sekiz yastığı ve üç bakracı ve beynlerinde ma‘lûm bir sofralık sahanı ve zikr olunan çiftlik-i mezbûr mahsûlünden hâlâ der-anbâr olan altı müd buğdayı ve iki müd arpayı ve altı tencereyi ve iki çift camus öküzünü ve bir çift kara sığır öküzünü ve bir re’s camus ineğini ve bir kara sığır ineğini ve beynlerinde ma‘lûm âlât-ı çiftlik ve esbâb-ı hırâsı ve yine çiftlik-i mezbûra karîb cevânib-i erba‘ası tarîk-i âma müntehî bir odayı müştemil bir kıt‘a büyük ahırı ve yine karye-i merkūme bağları dâhilinde vâki‘ her biri inde’l-ahâlî ma‘lûmü’l-hudûd olup tahmînen cümlesi altı dönüm dört kıt‘a mülk bağlarını cümle-i tevâbi‘ ve levâhıkı ve kâffe-i menâfi‘ ve merâfıkları ile bi safkatin vâhidetin müvekkile-i merkūme Râziye Hâtun’a yüz yirmi bin nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ edip kabz-ı semen-i ma‘dûd ve teslîm-i mebî‘ât-ı mezkûre eylediğinden sonra yine karye-i merkūme sınırında vâki‘ mevâzi‘-i adîdede her biri inde’l-ahâlî ve’l-cîrân tahmînen cümle yirmi beş müd tohum istî‘âb eder müvekkilim mutasarrıf olduğu işbu akdin sudûruna değin taht-ı tasarrufunda olan yirmi üç kıt‘a tarlaların ve yine karye-i merkūme kurbunda yedi kıt‘a müvekkilim mezbûr mutasarrıf olduğu çayırların hakk-ı tasarruflarını sâhib-i arz ma‘rifetiyle müvekkile-i mezbûre Râziye Hâtun’a tefvîz edip ol dahi minvâl-i muharrer üzre tefevvüz ve kabûl ettikden sonra mukābele-i tefvîzde olan otuz bin nakd-i fıddî-i Osmânî râyic fi’l-vakt akçeyi müvekkile-i merkūme Râziye yedinden bi’t-tamâm ve’l-kemâl ahz ve kabz eyledi ba‘de’l-yevm sâlifü’l-beyân mebî‘ât müvekkile-i merkūme Râziye’nin mülk-i müşterâ-yı sarîhidir ve mârrü’z-zikr arâzi ve çayırların dahi hakk-ı tasarrufları müvekkile-i merkūmenindir sâir emsâli tasarrufu gibi keyfe mâ yeşâ ve hasbe mâ yürîd mutasarrıf olsun dedikde vekîl-i mezbûr Maden Efendi’nin minvâl-i meşrûh üzre cârî olan ikrâr ve takrîrin el-mukarru lehü’l-mezbûr Ahmed Çavuş bi’l-muvâcehe tasdîk edicek mâ hüve’l-vâki‘ bi’t-taleb ketb olundu. Hurrire fi’t-târihi’l-mezbûr. Şuhûdü’l-hâl: İbrahim Çelebi b. Ali el-Müteferrika, Mehmed Ağa b. Abdullah el-Müteferrika, Ahmed Çavuş b. Ali, Ebûbekir Çelebi b. Ali, Ahmed b. Mahmud, Muharrem b. Ömer el-Câbî, Hasan Efendi b. İbrahim el-Mütevellî, Mahmud Bey b. ( ) el-Cündî Ali b. Abdullah, Rıdvan Ağa b. Abdullah, Ali b. Mansur, el-Hâc Davud b. Mehmed el-Müezzin.