Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 144 Hüküm no: 123 Orijinal metin no: [20a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Köfik v. Martino’nun tarlasının tasarruf hakkını Harito v. Nikola’ya devretmesi Vilâyet-i Rumeli’nde Mora sancağında Kartina kazâsına tâbi‘ İstemniçe nâm karye sâkinlerinden Köfik v. Martino nâm zimmî meclis-i şer‘-i hatîr-i lâzımü’t-tevkīrde işbu hâmil-i hâze’l-kitâb Harito v. Nikola nâm zimmî mahzarında bi’t-tav‘ ve’r-rızâ ikrâr ve takrîr-i kelâm edip karye-i mezbûre sınırı dâhilinde Polyaniro demekle ma‘rûf mevzi‘de vâki‘ bir tarafdan Trandafili v. İstemad tarlasına ve bir tarafdan Harito v. Nikola tarlasına ve bir tarafdan Polhoroni v. ( ) tarlasına ve bir tarafdan Yani v. İstemad tarlasına müntehî taht-ı tasarrufumda olan tahmînen diyârımız keyli ile iki keyl tohum istî‘âb eder bir kıt‘a tarlanın hakk-ı tasarrufunu sâhib-i arz ma‘rifetiyle mezbûr Harito’ya tefvîz edip ol dahi minvâl-i muharrer üzre tefevvüz ve kabûl elyedikden sonra mukābele-i tefvîzde olan beş bin nakd-i fıddî-i Osmânî râyic fi’l-vakt akçe[yi] mezbûr Harito yedinden bi’t-tamâm ve’l-kemâl ahz ve kabz eyledim ba‘de’l-yevm sâlifü’l-beyân tarlanın hakk-ı tasarrufu merkūm Harito’nundur, sâir emsâli tasarrufu gibi keyfe mâ yeşâ ve yahtâr mutasarrıf olsun dedikde mukırr-ı mezbûrun vech-i muharrer üzre cârî olan ikrâr ve takrîrin el-mukarru lehü’l-mezbûr Harito bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Hurrire fi’l-yevmi’t-tâsi‘ ve’l-ışrîn min Rebî‘ilevvel li târihi’l-mezbûr. Şuhûdü’l-hâl: Aleksi v. Dimo, Yani v. Rupi, Lambo v. Yorgi, Polhoroni v. Dimo, Aleksi v. Polhoroni, Dimo [v.] Laho, Panayoti v. Yorgi, Yani v. Nikola, Aleksi v. Nikola, Yani v. Kostantin ve gayruhüm mine’l-hâzırîn.