Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 144 Hüküm no: 124 Orijinal metin no: [20a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Koniçe kazâsından Mustafa Bey b. İsa’nın kendi raiyyeti olmayan Dimo v. Koya ile alâkasının kalmaması Vilâyet-i Rumeli’nde Yanya sancağında Konitse [Koniçe] kazâsına tâbi‘ Pilikat nâm karyede sâkin fahrü’l-eşbâh Mustafa Bey b. İsa tarafından husûs-ı âti’l-beyânı da‘vâ ve talebe vekîl olup vekâleti hasm-ı şer‘î-i câhid mahzarında bimâ hüve nehci’l-mu‘teberi’l-mer‘î şer‘an sâbite ve mütehakkika olan li ebeveyn karındaşı olan fahrü’l-akrân Durmuş b. İsa nâm cündî meclis-i şer‘-i hatîr-i lâzımü’t-tevkīrde işbu hâmil-i hâze’l-kitâb Dimo v. Koya nâm zimmî muvâcehesinde bi’t-tav‘ ve’r-rızâ ikrâr ve takrîr-i kelâm edip bundan akdem mezbûr Dimo ile bu âna gelince müvekkilim mûmâ-ileyh Mustafa Bey’in re‘âyâsından olmak zu‘muyla ra‘iyyete müte‘allik da‘vâ ve taleb edip münâza‘a ve münâkaşadan hâlî değil idim hâlâ defter-i hâkānîde mezbûr Dimo Havâss-ı hümâyûn re‘âyâsından olduğum mukarrerdir dediği ecilden defter-i atîk-i pâdişâhîyi yokladığımda devletlü ve sa‘âdetlü pâdişâh-ı âlem-penâh hazretlerinin re‘âyâlarından olduğu mastûr ve mukayyed olmağın ba‘de’l-yevm mezbûr Dimo ile min ba‘d ra‘iyyete müte‘allik müvekkilim mûmâ-ileyh Mustafa Bey’in medhal ve alâkası kalmadı dedikde vekîl-i mezbûr Durmuş Bey’in vech-i meşrûh üzre cârî olan ikrâr ve takrîrin merkūm Dimo bi’l-muvâcehe tasdîk edicek mâ hüve’l-vâki‘ bi’t-taleb ketb olundu. Hurrire fi’t-târihi’l-mezbûr. Şuhûdü’l-hâl: Mehmed Beşe b. Abdullah Kethüdâ-yı bostancıyân, Mustafa Ağa b. Demir Bey, Hasan Beş b. Mehmed, Kalender Beşe b. İsa el-Acemî, Mustafa b. Mehmed, Ali b. Abdullah, Yakub b. Kurd, Süleyman b. Turgud.