Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 145 Hüküm no: 125 Orijinal metin no: [20a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Beşe b. Rüstem’in Yani v. İstati’ye bazı emlâkini satıp bazısının da kullanım hakkını devretmesi Vilâyet-i Rumeli’nde Mora sancağında Kalavrita kazâsına tâbi‘ İlnasova nâm karyeden Ahmed Beşe b. Rüstem nâm râcil meclis-i şer‘-i hatîr-i lâzımü’t-tevkīrde işbu râfi‘ü hâze’l-kitâb Yani v. İstati nâm zimmî muvâcehesinde bi’t-tav‘ ve’r-rızâ ikrâr ve takrîr-i kelâm edip karye-i merkūme bağları dâhilinde vâki‘ Veli Çelebi bağına ve iki tarafdan Yanaki v. ( ) bağına ve bir tarafdan tarîk-i âma müntehî tahmînin bir çapalık bir kıt‘a mülk bağımdan ve karye-i merkūmede mevâzi‘-i adîdede vâki‘ otuz dip dut eşcârından ve eski Değirmenyeri demekle ma‘rûf mülk değirmen yerinden ve karye-i merkūmede vâki‘ taht-ı tasarrufumda olan kestane ve ceviz eşcârların nısf-ı şâyi‘lerini bi safkatin vâhidetin mezbûr Yani’ye dört bin nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ ve kabz-ı semen edip mebî‘ât-ı mezkûreyi mahallinde kabza müşterî-i merkūmu taslît eylediğimden sonra yine karye-i merkūme kurbunda her biri inde ahâliyi’d-diyâr ma‘lûmü’l-hudûd ve’l-mikdâr taht-ı tasarrufumda olan otuz sekiz kıt‘a tarlaların dahi nısf-ı şâyi‘lerini sâhib-i arz ma‘rifetiyle mezbûra tefvîz edip ol dahi minvâl-i muharrer üzre tefevvüz ve kabûl ettikden sonra [20b] mukābele-i tefvîzde olan üç bin sekiz yüz nakd-i fıddî-i Osmânî râyic fi’l-vakt akçeyi mezbûr Yani yedinden bi’t-tamâm ve’l-kemâl ahz eyledim ba‘de’l-yevm sâlifü’l-beyân mebî‘âtdan nısf-ı şâyi‘leri mezbûr Yani’nin mülk-i müşterâ-yı sarîhidir ve mârrü’z-zikr arâziden dahi nısf-ı şâyi‘leri mersûmundur sâir emsâli tasarrufu gibi mutasarrıf olsun dedikde mâ hüve’l-vâki‘ bi’t-taleb ketb olundu. Hurrire fi’t-târihi’l-mezbûr. Şuhûdü’l-hâl: Hüseyin Beş b. Mustafa er-Râcil, Mustafa b. Abdullah er-Râcil, Seydî b. Sinan, Mehmed b. Abdullah, Ali Beş b. Murad er-Râcil, Mustafa Beşe b. ( ), İskender Beşe b. Murad er-Râcil, Ali b. Abdullah, Süleyman b. Turgud, Yakub b. Kurd.