Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 146 Hüküm no: 126 Orijinal metin no: [20b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sâkine bt. Abdullah’ın menzilini Hacı Mehmed b. Mahmud’a satması Medîne-i Ebâ Eyyûb el-Ensârî -râdiye anhu Rabbühü’l-Bârî- mahallâtından Cebecibaşı mahallesinde sâkine Sâkine bt. Abdullah nâm hâtun meclis-i şer‘-i şerîf-i lâzımü’t-teşrîfde işbu hâmilü’l-kitâb el-Hâc Mehmed b. Mahmud nâm kimesne muvâcehesinde bi’t-tav‘ ve’r-rızâ ikrâr ve takrîr-i kelâm edip mahalle-i mezbûrede vâki‘ bir tarafdan el-Hâc Osman b. ( ) mülküne ve iki tarafdan Kerime bt. Behram mülküne ve bir tarafdan tarîk-i âma müntehî üç tahtânî beyti ve bi’r-i mâyı ve zât-ı eşcâr-ı müsmire ve gayr-ı müsmireyi hâvî cüneyneyi müştemil mülk menzilimi cümle-i tevâbi‘ ve levâhıkı ve kâffe-i menâfi‘ ve merâfıkı ile mezbûr el-Hâc Mehmed’e altı bin beş yüz fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ edip kabz-ı semen ve teslîm-i mebî‘ eyledim ba‘de’l-yevm sâlifü’l-beyân menzil-i mahdûde mezbûr Mehmed’in mülk-i müşterâ-yı sarîhidir sâir emlâki tasarrufu gibi keyfe mâ yeşâ ve yahtâr mutasarrıf olsun dedikde mukırra-i mezbûrenin vech-i mübeyyen üzre cârî olan ikrâr ve takrîrin el-mukarru lehü’l-merkūm el-Hâc Mehmed bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Hurrire fi’l-yevmi’r-râbi‘ min Rebî‘ilevvel li sene tis‘a ve ışrîn ve elf. Şuhûdü’l-hâl: Abdürrahim Halîfe b. Hasan el-İmâm, Musa b. Resul, Hasan Bey b. Abdullah el-Bevvâbü’s-sultânî, el-Hâc Mehmed b. Mehmed el-Mücellid, Mehmed Dede b. Habib, Mehmed b. Abdullah, Hasan b. Behram, Ali Çelebi b. İlyas, Murad b. Hüseyin, el-Hâc Hüseyin b. Abdullah.