Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 154 Hüküm no: 137 Orijinal metin no: [22b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kandilo’nun Mustafa b. Abdullah’a bazı emlâkini satıp bazısının da kullanım hakkını devretmesi Havâss-ı Aliyye kazâsı tevâbi‘inden Küçükhalkalı nâm karye sâkinelerinden Kandilo nâm nasrâniye meclis-i şer‘-i şerîfde işbu hâmil-i hâze’l-kitâb Mustafa b. Abdullah mahzarında bi’t-tav‘ ve’r-rızâ ikrâr ve takrîr-i kelâm edip karye-i merkūmede vâki‘ bir tarafdan değirmenci Yorgi mülküne ve bir tarafdan Cafer b. Abdullah mülküne ve bir tarafdan Kerim Efendi mülküne ve bir tarafdan Apostol mülküne müntehî mülk menzilimi bir tahtânî beyti müştemil ve yine karye-i merkūmede vâki‘ lede’l-ahâlî ve’l-cîrân ma‘lûmü’l-hudûd iki kıt‘a mülk bağlarımı ve bir mikdâr harâbe mülk bağ yerimi cümle-i tevâbi‘ ve levâhıkı ve kâffe-i menâfi‘ ve merâfıkı ile merkūm Mustafa’ya on bir bin yedi yüz fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ edip kabz-ı semen-i ma‘dûd ve teslîm-i mebî‘ât-ı mahdûde kıldığımdan sonra yine karye-i mezbûre sınırı dâhilinde lede’l-ahâlî ma‘lûmü’l-hudûd tahmînen on keyl tohum istî‘âb eder taht-ı tasarrufumda olan iki kıt‘a tarlanın dahi hakk-ı tasarrufunu mezbûra tefvîz edip ol dahi minvâl-i muharrer üzre tefevvüz ve kabûl kıldıkdan sonra mukābele-i tefvîzde olan üç yüz mezbûrü’n-na‘t akçeyi bi’t-tamâm ve’l-kemâl mezbûrun yedinden ahz ve kabz eyledim ba‘de’l-yevm sâlifü’l-beyân mebî‘ât-ı mahdûde mezbûr Mustafa’nın mülk-i müşterâ-yı sarîhidir ve mârrü’z-zikr tarlaların dahi hakk-ı tasarrufu mersûmundur sâir emsâli tasarrufu gibi keyfe mâ yeşâ ve yahtâr mutasarrıf olsun dedikde mukırra-i mezbûrenin vech-i mübeyyen üzre cârî olan ikrâr ve takrîrin el-mukarru lehü’l-mezbûr Mustafa bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Hurrire fi’l-yevmi’l-hâdî aşer min Rebî‘ilevvel li târihi’l-mezbûr. Şuhûdü’l-hâl: Halil b. Yunus, Rıdvan b. Abdullah, İbrahim b. Süleyman, Mehmed b. Abdullah, Süleyman b. Turgud, Yakub b. Kurd, Mustafa b. Mehmed, Ali b. Abdullah, Perviz [b.] Abdullah ve gayruhüm mine’l-hâzırîn.