Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 156 Hüküm no: 140 Orijinal metin no: [22b-4, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Tusa v. İspilyot’un evini Ahmed Çelebi Vakfı’na istiğlâl yoluyla sattığı Havâss-ı mahmiye-i Kostantıniyye tevâbi‘inden Avas karyesinde sâkin olan Tusa v. İspilyot nâm zimmî meclis-i şer‘-i şerîfde hâzır olup âtiyyü’z-zikr menzilini merhûm Ahmed Çelebi vakfı’na mütevellî olan hâmil-i hâze’l-kitâb el-Hâc (…) b. Yunus’a bey‘ ettiğini ikrâr ve i‘tirâf etti. Mütevellî-i mezbûr da vakf-ı mezbûr malıyla ve istiğlâl için mezbûr Tusa’nın işbu akdin sudûruna kadar sâhibi ve mâliki olduğu elinde ve taht-ı tasarrufunda bulundurduğu karye-i mezbûrede vâki‘ olup bir tarafdan (…) ve tarîk-i âm ile mahdûd olan menzilini cümle tevâbi‘ ve levâhıkı ve kâffe-i menâfi‘ ve merâfıkı ile râyicü’l-vakt on bin akçe-i Osmânî semen-i mu‘ayyen-i makbûzla iştirâ etti. Zimmî-yi mezbûrun menzil-i merkūmu kirâlamak istemesi üzerine müşterî-yi mezbûr ba‘de’t-tahliyye ve’t-tekābuz zeyl-i kitâbda mezkûr senenin gurre-i Muharrem-i harâmından bir sene tamâmına bin iki yüz akçe ücret-i kirâ mukābilinde menzil-i merkūmu icâreye verdi. Mütevellî-i mezbûr vâki‘ ikrârı vicâhen ve şifâhen tasdîk etti. Sonra mukırr-ı mezbûrun zevcesi Anya bt. İstavroz nâm nasrâniye menzil-i mezbûrun derkine ve ücret-i kirâya îcâb ve kabûlü hâvî kefâletle kefîl oldu. Cerâ zâlike fi’l-yevmi’l-hâdî aşer min Rebî‘ilâhir sene tis‘a ve ışrîn ve elf. Şuhûdü’l-hâl: Ahmed Çelebi b. İbrahim, Veli Halîfe b. Abdullah, fahrü’l-akrân mevlânâ Mehmed Efendi, Halil b. Mehmed, Musa b. Mustafa, Mustafa b. Hasan, İsmail b. Yasin ve gayruhüm