Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 157 Hüküm no: 141 Orijinal metin no: [23a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şaban Çavuş b. İlyas ve karısı Fâtıma bt. Pervâne’nin menzillerini Hacı İbrahim’e satmaları Medîne-i Ebâ Eyyûb-i Ensârî -râdiye anhu Rabbühü’l-Bârî- mahallâtından Takyecibaşı mahallesi sâkinlerinden fahrü’l-eşbâh Şaban Çavuş b. İlyas kendi tarafından asâleten ve zevcesi Fâtıma Hâtun bt. Pervâne tarafından husûs-ı âti’l-beyânı ikrâra vekîl olup vekâleti hasm-ı şer‘î-i câhid mahzarında Abdurrahman Halîfe b. Memi ve Bekir b. Ali şehâdetleri ile şer‘an sâbite oldukdan sonra bi’l-vekâle meclis-i şer‘-i hatîr-i lâzımü’t-tevkīrde işbu hâfız-ı hâze’l-kitâb el-Hâc İbrahim b. ( ) mahzarında bi’l-asâle ve’l-vekâle ikrâr ve takrîr-i kelâm edip vilâyet-i Rumeli’nde nefs-i Belgrad’da el-Hâc Veli mahallesi demekle ma‘rûf mahallede vâki‘ bir tarafdan el-Hâc Veli binâ eylediği câmi‘-i şerîfe ve bir tarafdan mu‘allimhâneye ve bir tarafdan el-Hâc Mehmed mülküne ve bir tarafdan İskender Bey bağına müntehî ve mahdûd olup işbu akdin sudûruna dek müvekkile-i merkūme ile silk-i mülk-i sahîhimde ale’l-iştirâki’s-seviy münselik ve münharıt olup bir fevkānî ve bir tahtânî beyti ve cüneyneyi müştemil mülk menzilimi cümle-i tevâbi‘ ve levâhıkı ile mezbûr el-Hâc İbrahim’e dokuz bin beş yüz fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ ve semen-i ma‘dûdu ale’l-iştirâki’s-seviy kabz edip mebî‘-i mezkûru mahallinde kabza müşterî-i merkūmu taslît kıldık ba‘de’l-yevm sâlifü’l-beyân menzil-i mahdûd-ı merkūmun mülk-i müşterâ-yı sarîhidir sâir emlâki tasarrufu gibi keyfe mâ yeşâ ve hasbe mâ yürîd mutasarrıf olsun dedikde mukırr-ı mezbûrun vech-i mübeyyen üzre cârî olan ikrâr ve takrîrin el-mukarru lehü’l-mezbûr el-Hâc İbrahim bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Hurrire fi’l-yevmi’s-sâmin min târihi’l-mezbûr. Şuhûdü’l-hâl: El-Hâc Hasan b. İbrahim, Kalender b. Yusuf er-Râcil, Ahmed b. Hobyar, Osman Beşe b. Hasan er-Râcil, Ahmed Bey b. Abdullah el-Cündî Mustafa Bey b. ( ) el-Cündî Mehmed Beşe b. Abdullah el-Cündî Ali b. Abdullah, Mustafa b. Mehmed.