Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 157 Hüküm no: 142 Orijinal metin no: [23a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Ağa b. Halil’in menzilini Ayşe bt. Halil’e satması Mahmiye-i Kostantıniyye -humiyet ani’l-âfât ve’l-beliyye- mahallâtından Nişâncı mahallesi sâkinlerinden fahrü’l-eşbâh Ali Ağa b. Halil tarafından menzil-i âti’l-beyânın bey‘ini ikrâra vekîl olup vekâleti hasm-ı şer‘î-i câhid mahzarında Hasan Halîfe b. Abdullah ve Mustafa b. Hasan nâm kimesneler şehâdetleri ile şer‘an sâbite olan fahrü’l-akrân Mehmed Bey b. Hamza nâm yesârî meclis-i şer‘-i hatîr-i lâzımü’t-tevkīrde işbu hâmiletü hâze’l-kitâb Ayşe bt. Halil tarafından husûs-ı âti’l-beyânı tasdîka vekîl olup vekâleti hasm-ı şer‘î-i câhid mahzarında yine şâhidân-ı mezkûrân şehâdetleri ile şer‘an sâbite olan Abdülbâkī Beşe b. Receb nâm râcil mahzarında bi’l-vekâle ikrâr ve takrîr-i kelâm edip müvekkilim mezbûr medîne-i Hazret-i Ebâ Eyyûb-i Ensârî -râdiye anhu Rabbühü’l-Bârî- mahallâtından Nazperver mahallesinde vâki‘ bir tarafdan Abdi Bey vakfı’na ve bir tarafdan Receb b. Abdullah mülküne ve bir tarafdan tarîk-i hâssa ve bir tarafdan tarîk-i âma müntehî bir fevkānî ve bir tahtânî beyti ve bi’r-i mâyı ve kenîfi ve eşcâr-ı müsmireyi hâvî cüneyneyi müştemil olan mülk menzilini cümle-i tevâbi‘ ve levâhıkı ile müvekkile-i merkūme Ayşe Hâtun’a elli bin fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ edip kabz-ı semen-i ma‘dûd ve teslîm-i mebî‘-i mahdûd kıldım ba‘de’l-yevm sâlifü’l-beyân menzil-i mahdûd müvekkile-i merkūme Ayşe Hâtun’un mülk-i müşterâ-yı sarîhidir sâir emsâli tasarrufu gibi keyfe mâ yeşâ ve yahtâr mutasarrıfe olsun dedikde mukırr-ı mezbûrun bi’l-vekâle cârî olan ikrâr ve takrîrin el-mukarru lehü’l-mezbûr bâkī bi’l-vekâle tasdîk edicek mâ hüve’l-vâki‘ bi’t-taleb ketb olundu. Hurrire fi’l-yevmi’l-hâmis ve’l-ışrîn min Rebî‘ilevvel min târihi’l-mezbûr. Şuhûdü’l-hâl: Hasan Halîfe b. Abdullah el-İmâm, Mustafa b. Hasan, Kalender b. Mahmud, Murad b. Abdullah, Hasan b. Abdullah, Mustafa b. Mehmed, Ali b. Abdullah, Süleyman b. Turgud, Yakub b. Kurd ve gayruhüm mine’l-hâzırîn.